U Turkmienistanie adzin błohier krytykavaŭ ułady. Nieŭzabavie znajšli jaho mahiłu
Žurnalisty turkmienskaj słužby «Radyjo Svaboda» znajšli miesca pachavańnia źnikłaha paŭtara miesiaca tamu błohiera Dzidara Amansachatava, paćvierdziŭšy tym samym infarmacyju pra jaho śmierć, piša «Radyjo Svaboda».
34‑hadovy Dzidar Amansachataŭ publikavaŭ materyjały ŭ sacyjalnych sietkach pad psieŭdanimam Chitroŭski. Jon krytykavaŭ u tyktoku ŭłady Turkmienistana, ekanamičnuju situacyju ŭ krainie i vysokija ceny na pradukty charčavańnia.
Amansachataŭ źnik u kancy listapada 2025 hoda. 18 śniežnia žurnalisty turkmienskaj słužby Radyjo Svaboda sa svaich krynic daviedalisia pra zatrymańnie Amansachatava supracoŭnikami siłavych struktur Turkmienistana i pra jaho vierahodnuju śmierć u vyniku katavańniaŭ siłavikami. Adnak ułady nie kamientavali miescaznachodžańnie błohiera i pryčyny jaho zatrymańnia.
Žychar Turkmienistana, jaki pažadaŭ zastacca nieviadomym, raskazaŭ «Radyjo Svaboda», što jaho samoha zabrali na dopyt — paśla taho, jak jon vykazaŭ spačuvańni na staroncy Chitroŭskaha ŭ suviazi sa śmierciu błohiera. Supracoŭnik Słužby biaśpieki Turkmienistana na dopycie pryhraziŭ mužčynu, zajaviŭšy, što los błohiera pavinien pasłužyć urokam dla luboha krytyka turkmienskaha ŭrada.
U adnym z apošnich videa Chitroŭski, u pryvatnaści, raskrytykavaŭ rezkaje pavyšeńnie cen na miasa, napisaŭšy, što hety pradukt niedastupny dla žycharoŭ Turkmienistana. Pra toje, što ŭ krainie charčovy kryzis, raniej paviedamlali i «Radyjo Svaboda», i inšyja niezaležnyja ŚMI. Pry hetym ułady Turkmienistana nikoli nie kamientujuć ceny na pradukty charčavańnia ŭ krainie, a taksama pytańni biespracoŭja ci nizkaha ŭzroŭniu žyćcia nasielnictva.
Pravaabarončyja arhanizacyi nazyvajuć Turkmienistan adnoj z samych zakrytych i represiŭnych krain śvietu, u jakoj niama palityčnych i asabistych svabod, a taksama svabody presy.
«Abyjakavaść i nianaviść». Jak žyvie Turkmienistan — kraina, palityčnuju sistemu jakoj kapijuje Łukašenka
Pucin u Turkmienistanie dvojčy nie zmoh pravilna vymavić proźvišča lidaraŭ hetaj krainy
U Turkmienistanie ciažarnaja žančyna pamierła, bo jaje aŭtamabil nie puścili praz kartež Bierdymuchamiedava
Aksakały Turkmienistana paprasili ŭ prezidenta bolš nie pavyšać zarobki, piensii i dapamohi
«Duchoŭnyja skrepy» pa-turkmiensku. Zabaraniajecca trymacca ŭ publičnych miescach za ruki, a žančynam nanosić makijaž
Ciapier čytajuć
U centry Minska tajamniča źnikła dačka dyrektara bujnoha ahrakompleksu5
Kamientary
No, vsiemu svojo vriemia.
Pryblizna, jak biełarusy ŭ Hruzii.