Rasija pačała pradavać naftu ź vialikimi źnižkami dla Kitaja i Indyi, u vyniku čaho zdabyča dla niekatorych kampanij stała stratnaj, paviedamlaje Reuters.
Pavodle śviedčańniaŭ analitykaŭ, cana rasijskaj Urals na minułym tydni apuskałasia da $33—34 za barel u bałtyjskich i čarnamorskich partach — najnižej za čas pandemii, a dyskont da Brent skłaŭ $27 za barel. Niekatoryja pastaŭki dla kitajskich NPZ pradavalisia sa źnižkaj $35 za barel, faktyčna za paŭcany.
Jak vynik, naftavaja pramysłovaść apynułasia na miažy rentabielnaści, i niekatoryja prajekty ŭžo pracujuć u minus. Adnak radoviščy, na jakija dziejničaje lhotnaja staŭka padatku na zdabyču karysnych vykapniaŭ, zastajucca prybytkovymi. Prybytkovaść zaležyć taksama ad hieahrafičnaha raźmiaščeńnia i składanaści zdabyčy: radoviščy ź vialikimi zapasami i blizka da trubapravodaŭ vytrymlivajuć, a addalenyja i składanyja radoviščy niasuć straty da $5 za barel.
U cełym naftavaja halina zastajecca ŭ plusie, ale prybytak vielmi mały: kala $3 za barel zastajecca na inviestycyi ŭ budučuju zdabyču, bureńnie i padtrymku radoviščaŭ. Sankcyi, jakija pazbavili kampanii dostupu da zachodniaha abstalavańnia, paharšajuć kryzis.
U pieršym paŭhodździ 2025 hoda prybytak «Rasnafty» skaraciŭsia ŭ try razy, «Łukojła» — u dva, «Hazpram nafty» — na 54%, a «Surhutnaftahaz» staŭ stratnym. Naftahazavyja dachody biudžetu za studzień—listapad skaracilisia na 21%, a ŭ śniežni, pa raźlikach Reuters, buduć najnižejšyja sa žniŭnia 2020 hoda.
Rasijski biudžet 2026 hoda składali pry ŭmovie, što Urals budzie kaštavać $56 za barel, ale faktyčna cana nižejšaja na tracinu, što pahražaje vialikim niedaboram naftahazavych dachodaŭ u studzieni.
Kamientary