U Biełarusi pradajuć «bandyckuju» BMW 1990 hoda vypusku za šalonyja hrošy. Pišuć, što aŭto ź Japonii
Za amal 35 hadoŭ mašyna prajechała ŭsiaho 52 tysiačy kiłamietraŭ.
Pradaviec zapeŭnivaje, što aŭtamabil znachodzicca ŭ muziejnym stanie, u całkam zavodskim vykanańni i maje redki koler Vulkan-Grau.
Prosiać za 35‑hadovuju BMW 5‑j sieryi ŭ kuzavie E34 31 900 dalaraŭ.
U abjavie paznačana, što mašyna ŭsiaho miesiac tamu pryjechała da nas ź Japonii, a prabieh u 52 tysiačy aryhinalny, i nibyta jość usie dakumienty, jakija mohuć jaho paćvierdzić.
Pravierka aŭto pa ŭkazanym VIN-numary pakazvaje, što jon sapraŭdy naležyć hetamu aŭto i što z kanviejera hetaja BMW syšła 1 kastryčnika 1990 hoda. Niahledziačy na toje, što ŭ Japonii levabakovy ruch, rul u hetaj BMW z zavoda staić ź levaha boku, što dla Japonii choć i redkaść, ale nie takaja ŭžo i vialikaja.
Pravierka numara kuzava pryvodzić na sajt łatvijskaj kampanii, jakaja śpiecyjalizujecca na imparcie janhtajmieraŭ i kłasičnych aŭto ź Japonii. Mašyna tam znachodzicca ŭ bazie ŭžo pradadzienych aŭto.
Na sajcie łatvijskaha pradaŭca jość foty hetaj BMW, pa jakich vidać, što mašyna sapraŭdy znachodziłasia ŭ Japonii, i foty, jakija, pa ŭsioj bačnaści, byli zroblenyja ŭžo ŭ Łatvii.
Na momant prodažu ŭ hetaj krainie prabieh aŭto składaŭ 49 730 kiłamietraŭ. Tamu atrymlivajecca, što ź Japonii mašyna spačatku trapiła ŭ Łatviju, a adtul užo ŭ Biełaruś. Data mytnaha afarmleńnia ŭ Biełarusi — 4 listapada 2025 hoda.
Toj fakt, što heta sapraŭdy toj samy aŭtamabil, paćviardžaje fota z abjavy na av.by, dzie bačnyja padnumarnyja ramki z sajtam łatvijskaha pradaŭca i ślady ad nalepki «535i», jakuju ŭ Biełarusi vyrašyli prybrać, bo heta ŭsio ž viersija 525i z 2,5‑litrovym bienzinavym ruchavikom pad kapotam, a nie z 3,5 litra.
Što da kamplektacyi, to heta davoli šarahovaja viersija dla BMW 5‑j sieryi tych hadoŭ vypusku. Što da stanu, to aŭtamabil dla svajho ŭzrostu vyhladaje sapraŭdy vielmi dobra.
Nakolki takaja cana apraŭdanaja — pytańnie składanaje, ale z apisańnia ŭ abjavie vyhladaje, što pradaviec u tym liku raźličvaje na pakupnikoŭ z Rasii. «Razmytniena + zrobleny elektronny pašpart na Rasiju» — havorycca ŭ apisańni.
BMW 5‑j sieryi E34 vypuskałasia z 1988 pa 1996 hod, za hety čas było vypuščana 1 333 412 aŭto ŭ kuzavach siedan i ŭniviersał.
Na postsavieckaj prastory hetaja madel atrymała rasšyfroŭku BMV jak «Bajavaja Mašyna Vymahalnikaŭ» praz papularnaść «piaciorki» ŭ kryminalnych kołach. Paźniej mienavita E34 čaściakom vykarystoŭvali ŭ filmach pra bandyckija 90-ja, typu «Žmurak» Alaksieja Bałabanava.
«Naša Niva» — bastyjon biełaruščyny
PADTRYMAĆ
Pamior paet Uładzimir Karyzna, aŭtar słoŭ da ciapierašniaha dziaržaŭnaha himna Biełarusi8
Pamior paet Uładzimir Karyzna, aŭtar słoŭ da ciapierašniaha dziaržaŭnaha himna Biełarusi
Viadomy partret Kahanca akazaŭsia savieckim fejkam, zatoje znajšłosia adzinaje fota archieołaha Tatura. Razhadanyja fotatajamnicy Biełaruskaha muzieja ŭ Vilni
Kamientary