«Novaja viersija daktryny Manro ad Trampa». U čym sutnaść novaj stratehii nacyjanalnaj biaśpieki ZŠA 

Asnoŭnaja ideja stratehii — ZŠA bolš nie buduć aŭtamatyčna apiekavacca słabiejšymi partniorami. Zamiest hetaha jany pierachodziać da madeli dačynieńniaŭ, zasnavanaj na ŭzajemnaj vyhadzie. Heta tyčycca pierš za ŭsio Jeŭropy i afrykanskich krain. Siarod inšaha płanujecca skaracić vajskovuju dapamohu jeŭrapiejcam, kab Jeŭropa bolš raźličvała na ŭłasnyja siły.

Amierykanskaja administracyja krytykuje Jeŭropu za palityku, jakaja, na ich dumku, viadzie kantynient da ŭnutranaha asłableńnia — pieradusim havorka pra mihracyju.

U dakumiencie śćviardžajecca, što Jeŭropa straciła častku svajoj identyčnaści i ŭpeŭnienaści, tamu i ŭsprymaje Rasiju jak ekzistencyjalnuju pahrozu, choć u vajskovym płanie (akramia jadziernaj zbroi) maje značnuju pieravahu.

ZŠA ličać za adzin sa svaich hałoŭnych intaresaŭ jak maha bolš chutkaje spynieńnie bajavych dziejańniaŭ va Ukrainie. Heta, pavodle stratehii, pavinna stabilizavać jeŭrapiejskuju ekanomiku, źnizić ryzyku eskałacyi i stvaryć umovy dla adbudovy Ukrainy. Vašynhton padkreślivaje, što dla paśpiachovaj kankurencyi i strymlivańnia supraciŭnika jamu patrebna mocnaja Jeŭropa.

Unutry krainy ZŠA robiać akcent na biaśpiecy i abaronie nacyjanalnych intaresaŭ. Asnoŭnyja zadačy:

• abarona hramadzian i ekanomiki ad vajennych pahroz i zamiežnaha ŭpłyvu — ad špijanažu da prapahandy;
• poŭny kantrol nad miežami i mihracyjaj;
• padtrymka najmacniejšaha i samaha technałahičnaha vojska ŭ śviecie;
• raźvićcio sučasnaha jadziernaha arsienału i stvareńnie novaj supraćrakietnaj abarony, uklučna ź sistemaj «Załaty kupał»;
• budaŭnictva samaj mahutnaj i inavacyjnaj ekanomiki.

Taksama ZŠA płanujuć umacoŭvać pramysłovuju bazu, pavialičvać vytvorčaść abaronnych technałohij, raźvivać enierhietyku i navukovy patencyjał.

Vašynhton abviaščaje viartańnie da pryncypaŭ daktryny Manro — idei, pavodle jakoj ZŠA źjaŭlajucca hałoŭnaj siłaj u zachodnim paŭšarji i majuć prava ŭpłyvać na situacyju ŭ krainach rehijona. Hety padychod u dakumiencie nazvany «novaj viersijaj daktryny Monro ad Trampa».

ZŠA chočuć uzmacnić supracoŭnictva ź dziaržavami Amieryki ŭ baraćbie z kartelami i transnacyjanalnaj złačynnaściu. Na hłabalnym uzroŭni Vašynhton bačyć svaju rolu ŭ padtrymańni biaśpieki Jeŭropy, niedapuščeńni daminavańnia Irana na Blizkim Uschodzie i pašyreńni inviestycyj u rehijonie, uklučna z vysokatechnałahičnymi halinami.

U dačynieńniach z Afrykaj ZŠA chočuć adyści ad adnabakovaha «dapamožnaha» padychodu i pierajści da partniorstva, zasnavanaha na handli dy inviestycyjach. Asablivuju ŭvahu płanujuć nadavać enierhietyčnamu siektaru i zdabyčy redkich minierałaŭ.

U dakumiencie padkreślivajecca, što kraina ŭžo vałodaje bolšaściu resursaŭ, nieabchodnych dla realizacyi ambicyj: hnutkaj palityčnaj sistemaj, najbujniejšaj ekanomikaj, finansavaj siłaj dalara, technałahičnym lidarstvam, mahutnym vojskam, šyrokaj sietkaj źviazaŭ i bahatymi pryrodnymi resursami.

Stratehija stavić metu ŭmacavać hłabalnaje pieršynstvo Amieryki i zrabić jaje, jak śćviardžajuć aŭtary, «macniejšaj, čym kali-niebudź».

• 6
• 0
• 3
• 5
• 0
• 1
• 1
• 0