Hiermanija naroščvaje vajskovuju moc i mianiaje bałans sił u Jeŭropie

Da 2029 hoda Hiermanija płanuje vydatkoŭvać na abaronu 153 miljardy jeŭra štohod. Heta kala 3,5% VUP — samaja ambitnaja vajskovaja prahrama z časoŭ abjadnańnia krainy. Dla paraŭnańnia, Francyja płanuje dasiahnuć uzroŭniu 80 miljardaŭ jeŭra tolki da 2030 hoda, piša POLITICO.

Polšča, u svaju čarhu, užo sioleta vydatkuje na abaronu 44 miljardy jeŭra, što składaje 4,7% VUP — najvyšejšy pakazčyk u NATA. Varšava maje ćviordy namier stvaryć adnu z najmacniejšych armij u Jeŭropie.

Adnak ekanamičnyja realii roznyja. Pakul Paryž zmahajecca ź dziaržaŭnym doŭham, jaki pieravyšaje 110% VUP, a Varšava sprabuje ŭtrymać biudžet pad kantrolem na fonie rezkaha rostu vajskovych vydatkaŭ, nizkaja zapazyčanaść Bierlina daje jamu svabodu dziejańnia, jakoj susiedzi mohuć tolki pazajzdrościć.

Adzin z čynoŭnikaŭ ES nazvaŭ hety zruch «tektaničnym». Inšy dypłamat u intervju vydańniu vykazaŭsia bolš prosta: «Heta samaje važnaje, što ciapier adbyvajecca na ŭzroŭni ES».

«Hiermanija najpierš»: staŭka na ŭłasnuju pramysłovaść

Bierlin nie śpiašajecca pieradavać kantrol nad zakupkami zbroi jeŭrapiejskim strukturam. Naadvarot, jon płanuje aktyŭna vykarystoŭvać artykuł 346 Damovy ab ES, jaki dazvalaje abychodzić praviły kankurencyi dziela padtrymki nacyjanalnych vytvorcaŭ.

Pavodle ŭnutranych dakumientaŭ, ź jakimi aznajomiłasia Politico, da kanca 2026 hoda Bundestah płanuje zaćvierdzić abaronnyja kantrakty na sumu 83 miljardy jeŭra. Heta tolki pačatak. Isnuje taksama doŭhaterminovy «śpis žadańniaŭ» Bundeśviera na 377 miljardaŭ jeŭra, jaki achoplivaje bolš za 320 prahram uzbrajeńniaŭ.

Pavialičyć

Charakterna, kudy pojduć hetyja hrošy. Mienš za 10% novych kantraktaŭ dastaniecca amierykanskim pastaŭščykam. Amal usie astatnija srodki zastanucca ŭ Jeŭropie, i značnaja ich častka — u samoj Hiermanii. Ekanamičny ruchavik ES pieratvarajecca jašče i ŭ vajskova-pramysłovy.

Tryvoha ŭ Paryžy

U Francyi na pieraŭzbrajeńnie Hiermanii hladziać sa skiepsisam i zaniepakojenaściu. Niahledziačy na sproby prezidenta Makrona naładzić adnosiny, niedavier da Bierlina ŭ francuzskich vajskovych kołach zastajecca hłybokim.

«Ź imi budzie ciažka pracavać, bo jany buduć nadzvyčaj daminavać», — pryznaŭsia adzin z francuzskich čynoŭnikaŭ. Jon zmročna pažartavaŭ, što Hiermanii bolš nie treba budzie ŭryvacca ŭ Elzas i Mozel (francuzskija rehijony, akupavanyja ŭ 1940 hodzie), «jany mohuć prosta ich kupić».

Francuzskija i jeŭrapiejskija čynoŭniki taksama zadajucca pytańniem, jakuju hieapalityčnuju rolu maje namier adyhryvać Bierlin pad kiraŭnictvam Mierca.

Apošnija sprečki vakoł prajekta stvareńnia Bajavoj avijacyjnaj sistemy novaha pakaleńnia (Future Combat Air System, FCAS) koštam 100 miljardaŭ jeŭra, jaki pavinien byŭ realizoŭvacca Francyjaj, Hiermanijaj i Ispanijaj, tolki ŭzmacnili tryvohu. Ale zatrymki i sprečki pra toje, jakoj krainie pavinna dastacca bolšaja častka pracy, davodziać hetaje partniorstva amal da razryvu.

Hiermanija ŭžo razhladaje alternatyŭnyja varyjanty supracy sa Šviecyjaj ci Vialikabrytanijaj albo praciah supracoŭnictva tolki ź Ispanijaj. Takaja pierśpiektyva vyklikaje zakłapočanaść Francyi, dla jakoj FCAS — heta chutčej palityčny prajekt, źviazany ź jaje jadziernym strymlivańniem i pretenzijaj na vajskovaje lidarstva ŭ Jeŭropie. Kali Bierlin budzie rabić staŭku na sajuz z krainami Paŭnočnaj i Uschodniaj Jeŭropy, Paryž ryzykuje stracić svaju centralnuju rolu.

Aściarožnaje adabreńnie Varšavy

Adnak nie ŭsie bačać u mocnaj Hiermanii pahrozu. U Varšavie jaje pieraŭzbrajeńnie ličać nieabchodnym i navat zapoźnienym krokam.

«My nie možam uvieś čas kazać: «Usie pavinny vydatkoŭvać bolš na abaronu. Ale tolki nie vy, Hiermanija», — adznačaje były pasoł Polščy ŭ Izraili i ZŠA Marek Mahieroŭski.

Polskija čynoŭniki padkreślivajuć: tak, histaryčnyja traŭmy nikudy nie źnikli, ale ciapierašnija abstaviny patrabujuć realizmu.

Namieśnik ministra abarony Polščy Pavieł Zaleŭski adznačaje, što naroščvańnie vajennaj mahutnaści Hiermanii adbyvajecca na fonie sihnałaŭ Vašynhtona ab skaračeńni svajoj jeŭrapiejskaj prysutnaści. U budučyni mienavita Polšča i Hiermanija stanuć hałoŭnymi abaroncami ŭschodniaha fłanhu.

Tym nie mienš, u Varšavie dobra pamiatajuć nie tolki Druhuju suśvietnuju vajnu, ale i prarasijskuju palityku byłoj kanclerki Anhieły Mierkiel. Zaniepakojenaść vyklikaje i rost papularnaści ŭ Hiermanii prapucinskaj partyi «Alternatyva dla Hiermanii» (AfD), u jakoj chapaje prapucinskich elemientaŭ.

«My ničoha nie zabyvajem i budziem pastajanna praviarać, nakolki rašuča Hiermanija hatovaja abaraniać mižnarodny paradak ad Rasii», — padkreślivaje Zaleŭski.

Novy centr Jeŭropy

Jak adznačaje vydańnie, chutkaje ŭzmacnieńnie Hiermanii i nieadnaznačnaja reakcyja partnioraŭ śviedčać pra toje, što centr ciažaru ŭ Jeŭropie ssoŭvajecca na ŭschod. Ekanamičny hihant ES Hiermanija stanovicca vajskova-pramysłovym, Francyja trymajecca za svoj jadzierny status, a Polšča pieratvarajecca ŭ ciažkavahavika na ŭschodnim fłanhu NATA.

Pierad Brusielem staić vyklik: ci zmoža ES nakiravać hety novy impuls u supolnyja struktury, ci heta pryviadzie da jašče bolšaj raźjadnanaści? Pakul što ŭzmacnieńnie Bierlina ŭsprymajecca jak viartańnie da adkaznaści, a nie jak zajaŭka na panavańnie. Ale navat prychilniki pryznajuć, što maštab pieramienaŭ ciažka ŭśviadomić.

«Heta moža pałochać, biez sumnievu, — kaža adzin ź jeŭrapiejskich dypłamataŭ. — Ale Hiermanija — častka ES i NATA, u jaje kaalicyjnyja ŭrady. I da taho ž, da poŭnaj realizacyi hetych płanaŭ jašče šmat što moža zdarycca».

• 12
• 1
• 1
• 0
• 1
• 1
• 1
• 0