Kreml rehularna vydaje «kansiervy» z Pucinym, ale detali vydajuć pastanoŭku
U 2025 hodzie pres-słužba Kramla nieadnarazova publikavała zahadzia zapisanyja sustrečy Uładzimira Pucina z roznymi asobami, pradstaŭlajučy ich jak novyja. Takija videa atrymali nazvu «kansiervy» — ich pakazvajuć u dni, kali rasijski kiraŭnik faktyčna nie źjaŭlajecca na publicy. Rasśledavalnicki prajekt «Sistema» pakazaŭ na prykładach, što ŭ takich siužetach nie tak, piša «Nastojaŝieje vriemia».
Kab hetyja pastanoŭki vyhladali pierakanaŭča, udzielnikam sustreč zahadvajuć apranacca ŭ toje ž adzieńnie i z tymi ž aksesuarami ŭ dzień publikacyi «kansiervy», kali jany źjaŭlajucca na inšych aficyjnych mierapryjemstvach. Heta stvaraje ŭražańnie, što sustreča z Pucinym adbyłasia «siońnia».
Adnak rasśledavańnie prajekta «Sistema» pakazała, što vydajuć padman detali — upryhožańni, hadzińniki, raźmiaščeńnie knih u kabiniecie Pucina abo navat ałoŭki i ručki na jaho stale.
Prykłady «kansiervaŭ»
1. Śviatłana Čupšava, kiraŭnica Ahienctva stratehičnych inicyjatyŭ
- Zapis: nie paźniej za luty 2025
- Publikacyja: 9 krasavika 2025
U «kansiervie» jana ŭ čornym žakiecie z załatymi huzikami. U toj ža dzień, kali videa pakazali, Čupšava źjaviłasia na pasiadžeńni ŭrada i padpisańni damovy z chirurhami taksama ŭ tym samym žakiecie. Ale detali nie supali: u Kramli jana była ŭ adnych zavušnicach, a na realnym mierapryjemstvie — u inšych.
Da taho ž pa knihach na palicy ŭ kabiniecie Pucina vidać, što zapis zrobleny zadoŭha da krasavika.
2. Dźmitryj Hryharenka, vice-premjer
- Zapis: nie paźniej za siaredzinu žniŭnia 2025
- Publikacyja: 25 žniŭnia 2025
Na sustrečy ŭ Kramli jon byŭ u ciomna-sinim halštuku z kropielnym uzoram i z masiŭnym hadzińnikam. Pa knihach u kabiniecie Pucina rasśledavalniki zaŭvažyli, što videa źniata raniej, bo tam jašče nie było zbornika paezii desantnikaŭ, jaki ŭpieršyniu źjaviŭsia ŭ siaredzinie žniŭnia.
Kab «kansierva» vyhladała śviežaj, Hryharenka ŭ dzień publikacyi nadzieŭ toj ža halštuk i hadzińnik na pasiadžeńnie ŭrada.
3. Śviatłana Radzijonava, kiraŭnica Fiederalnaj słužby pa nahladzie ŭ śfiery pryrodakarystańnia (Raspryrodnahlad)
- Zapis: nie paźniej za siaredzinu vieraśnia 2025
- Publikacyja: 21 kastryčnika 2025
Da Pucina jana pryjšła ŭ błakitnaj błuzcy ź mietaličnymi huzikami. Pa źmienach na palicach vidać, što heta stary zapis. U dzień publikacyi jana ŭdzielničała ŭ pasiadžeńni Savieta Fiederacyi — taksama ŭ hetaj samaj błuzcy. Ale tam užo byli inšyja detali: u Kramli na ruce byŭ tolki branzalet, a ŭ Saviecie Fiederacyi — hadzińnik i piarścionak.
Žurnalisty zaŭvažajuć, što raźmiaščeńnie knih i roznych drobiaziaŭ u kabiniecie Pucina pastajanna mianiajecca — biez łohiki, ale z dakładnym paŭtoram u peŭnych «kansiervach». Kali na roznych «sustrečach» knihi stajać u adnolkavym paradku, heta śviedčyć, što zdymki zroblenyja ŭ adzin dzień.
Toje ž samaje — z ručkami i ałoŭkami na stale Pucina. Naprykład, padčas dźviuch roznych «sustreč» (z Čupšavaj u vieraśni i Radzijonavaj u kastryčniku) pradmiety na stale raźmieščanyja identyčna, choć pamiž publikacyjami minuła paŭtara miesiaca i adbyłosia dzieviać inšych mierapryjemstvaŭ, dzie ŭsio stajała inakš.
Na zapyty žurnalistaŭ u hetaj spravie Kreml ni razu nie adkazaŭ, ci sapraŭdy vykarystoŭvaje «kansiervy». Ale novyja prykłady, jakija znachodziać rasśledavalniki, paćviardžajuć: značnaja častka «śviežych» sustreč Pucina — heta papiarednie zapisanyja videa, jakija vypuskajuć dla padtrymańnia ŭražańnia pastajannaj aktyŭnaści prezidenta Rasii.
Ciapier čytajuć
«Narod pamiraje, i balnic nie treba. Hałoŭnaje prezidenckaja i deputackaja!!!». Što ludzi pišuć pra zakryćcio reabilitacyjnaha centra na Homielščynie77
«Narod pamiraje, i balnic nie treba. Hałoŭnaje prezidenckaja i deputackaja!!!». Što ludzi pišuć pra zakryćcio reabilitacyjnaha centra na Homielščynie7
Były muž błohierki, jakaja razam z 17‑hadovym žanichom šykavała na sabranaje dla chvoraha dziciaci, raskrytykavaŭ tych, chto hetyja hrošy joj pieravodziŭ2222
Kamientary
Z narodnaha.
Prosta jak pra kamunizm napisana.