Sustreču Trampa i Pucina ŭ Budapiešcie admianili z-za miemaranduma MZS Rasii
ZŠA admianili sustreču Donalda Trampa z Uładzimiram Pucinym u Budapiešcie paśla taho, jak Rasija nakiravała Vašynhtonu miemarandum, u jakim utrymlivalisia žorstkija patrabavańni da Ukrainy, a taksama paśla telefonnaj razmovy dziaržaŭnaha sakratara ZŠA Marka Rubia i kiraŭnika MZS Rasii Siarhieja Łaŭrova, piša Financial Times sa spasyłkaj na krynicy.
Havorka idzie pra dakumient, jaki MZS Rasii nakiravaŭ Vašynhtonu praź niekalki dzion paśla apošniaj telefonnaj razmovy Pucina i Trampa. Miemarandum utrymlivaŭ patrabavańnie likvidavać «karannyja pryčyny» ŭvarvańnia va Ukrainu, paviedamili try krynicy, znajomyja ź situacyjaj.
Da hetych pryčyn adnosiacca terytaryjalnyja ŭstupki, rezkaje skaračeńnie ŭzbrojenych sił Ukrainy i harantyi taho, što jana nikoli nie ŭstupić u NATO.
Paśla hetaha adbyłasia telefonnaja razmova pamiž Łaŭrovym i Rubia. Pa jaje vynikach Rubia paviedamiŭ Trampu, što Maskva nie prajaŭlaje hatoŭnaści da pieramoŭ, raspaviała adna z krynic, znajomaja ź situacyjaj.
Pavodle inšaj krynicy, znajomaha ź situacyjaj, Tramp «nie byŭ uražany ich pazicyjaj».
Rašeńnie admianić samit u Budapiešcie stała kulminacyjaj čarhovaha pavarotu ŭ palitycy Biełaha doma, kali Tramp admoviŭsia ad idei pastavić va Ukrainu rakiety vialikaj dalokaści Tomahawk i, jak zdavałasia, zaniaŭ bolš vyhadnuju dla Pucina pazicyju.
Praŭda, da hetaha času aficyjnyja asoby ZŠA ŭžo pačali adčuvać usio bolšyja sumnieńni adnosna dalejšaj vynikovaści pieramoŭ z Rasijaj, kali Maskva nie źmienić svaju pazicyju. U pryvatnaści, čynoŭniki Biełaha doma byli ździŭlenyja nieprymirymaściu Łaŭrova, jaki padčas karotkaj i łakaničnaj sustrečy z Rubia ŭ Ńju-Jorku ŭ vieraśni rabiŭ bieskampramisnyja zajavy, iłžyva śćviardžajučy, što Ukraina znachodzicca pad uładaj «nacystaŭ».
«Łaŭroŭ vidavočna stamiŭsia i, vidać, ličyć, što ŭ jaho jość spravy važniejšyja, čym sustrakacca abo ŭzajemadziejničać z Złučanymi Štatami, čaho b ni chacieŭ prezident Pucin», — paviedamiła krynica, znajomaja ź situacyjaj.
Tramp nie admoviŭsia kančatkova ad idei sustrecca z rasijskaj delehacyjaj, kali Kreml budzie hatovy da prahresu ŭ pieramovach ab miry, paviedamlaje FT sa spasyłkaj na krynicy.
Ciapier čytajuć
Kadebešniki telefanujuć biełarusam u emihracyi praź ich siabroŭ — čaho chočuć?10
Kamientary