U Arenburhu 20 kastryčnika znoŭ uspychnuŭ pažar na hazapierapracoŭčym zavodzie «Hazprama», jaki napiaredadni byŭ paškodžany padčas ataki dronaŭ. Jak paviedamlajuć miascovyja žychary i ŚMI, na miesca zdareńnia vyjechali pažarnyja padraździaleńni MNS. Pryčyna paŭtornaha ŭzharańnia pakul nieviadomaja. U sacsietkach źjavilisia videa, dzie vidać vializny słup ahniu, paviedamlaje The Moscow Times.
Pavodle raniejšych paviedamleńniaŭ, u vyniku ataki bieśpiłotnikaŭ 19 kastryčnika na pradpryjemstvie zahareŭsia adzin z cechaŭ i byli zroblenyja paškodžańni. Hubiernatar vobłaści Jaŭhienij Sołncaŭ paviedamiŭ, što zavod byŭ častkova vyviedzieny z ładu. U Hienštabie Uzbrojenych sił Ukrainy zajavili, što ŭdar pryjšoŭsia pa adnoj z ustanovak pa pierapracoŭcy i ačystcy hazu.
Pavodle krynic vydańnia «Kommiersant», zavod časova spyniŭ pracu častki vytvorčych mahutnaściaŭ i pryjom syraviny z kazachstanskaha radovišča Karačahanak. Ministerstva enierhietyki Kazachstana paćvierdziła, što atrymała paviedamleńnie ad «Hazprama» pra «avaryjnuju situacyju paśla ataki dronaŭ».
Arenburhski hazapierapracoŭčy zavod źjaŭlajecca častkaj najbujniejšaha ŭ śviecie hazachimičnaha kompleksu, jaki pierapracoŭvaje kala 37,5 miljarda kubamietraŭ hazu štohod. Heta adzinaje pradpryjemstva ŭ Rasii, jakoje vyrablaje adarant — rečyva, što nadaje hazu charakterny pach dla vyjaŭleńnia ŭciečak. Da 2025 hoda zavod taksama ŭdzielničaŭ u pastaŭkach hazu ŭ Jeŭropu praz terytoryju Ukrainy.
Asnoŭnaja funkcyja pradpryjemstva — raździaleńnie pryrodnaha hazu na kampanienty. Mietan pastupaje pa trubapravodach spažyŭcam, prapana-butanavaja sumieś vykarystoŭvajecca jak aŭtamabilnaje i bytavoje paliva, a etan — jak syravina ŭ chimičnaj pramysłovaści. Akramia taho, zavod technałahična źviazany z hielijevaj vytvorčaściu, pradukcyja jakoj vykarystoŭvajecca ŭ elektronicy i atamnaj enierhietycy.
Śpiavak Dźmitryj Kałdun pakazaŭ svaju minskuju kvateru niedaloka ad Drazdoŭ ŠMAT FOTA15
Kamientary