Z dakładnoj zapiski Mašenskaha Łukašenku stała viadoma pra dziaržaŭnyja źnižki dla kampanii biznesmiena

«Biełpoł» pakazaŭ dakładnuju zapisku Mašenskaha na imia Łukašenki, dzie havorycca pra śpiecyfiku elektrazabieśpiačeńnia kampanijaj «Klin Enierdžy Hrup Bieł» babrujskaj «Biełšyny».

Sa słoŭ pradstaŭnika abjadnańnia byłych siłavikoŭ Maćvieja Kuprejčyka, palityk atrymaŭ dakumient «u kancy 2018 — pačatku 2019 hoda».

Pavialičyć

U zapiscy Mašenskaha paviedamlajecca, što «prykładna ŭ 2007‑2008 hadach «Biełšyna» ŭ metach ekanomii elektraenierhii vyrašyła pabudavać vysokatechnałahičnuju hazaturbinnuju ŭstanoŭku dla pierapracoŭki hazu ŭ elektryčnaść, par i ciapło, jakija nieabchodnyja <…> u tym liku dla vytvorčaści bujnahabarytnych šyn».

Prajekt byŭ uchvaleny Departamientam pa enierhaefiektyŭnaści, Minekanomiki i ŭradam, u 2012 hodzie «Biełšyna» vyrašyła pryciahnuć inviestycyi dla jaho realizacyi. Tak u hulniu ŭvajšła firma «Klin Enierdžy Hrup Bieł» z tady jašče izrailskim kapitałam. U zapiscy paznačana, što ŭ listapadzie 2015‑ha «praź finansavyja prablemy prajekt byŭ faktyčna zamarožany», pastaŭlać «Biełšynie» elektryčnaść stała RUP «Mahiloŭenierha».

Taksama vynikaje, što z asabistaha adabreńnia Łukašenki (u pakazanaj zapiscy tak i paznačana — «z vašaha adabreńnia») Kampanija «Santa Bremar», jakaja naležyć Mašenskamu, uvajšła ŭ skład udzielnikaŭ «Klin Enierdžy Hrup Bieł», vykupiŭšy ŭ izrailskich inviestaraŭ dolu, jakaja naležyć im (90% u statutnym fondzie). Paśla hetaha prajekt pa akazańni pasłuh «Biełšynie» u śfiery enierhietyki byŭ adnoŭleny, dla jaho zaviaršeńnia pryciahnuli 8 miljonaŭ dalaraŭ inviestycyj, sa žniŭnia 2018 hoda enierhakompleks byŭ hatovy da ekspłuatacyi.

Pry hetym, jak paviedamlajecca ŭ dakumiencie, «Klin Enerdžy Hrup Bieł» była dasiahnutaja damoŭlenaść z «Biełšynaj» ab cenach na enierhanośbity (taryf minus 5%). Adnak u 2017 hodzie ŭradam była pryniataja pastanova ab nadańni «Biełšynie» dziaržpadtrymki ŭ vyhladzie źnižeńnia na 34,9% taryfu na apłatu elektraenierhii, atrymanaj ad «Mahiloŭenerha». I ŭmovaj kupli elektraenierhii ŭ «Klin Enierdžy Hrup Bieł» kampanija «Biełšyna» vyznačyła pradstaŭleńnie źnižki ŭ 5% nie da bazavaha, a ŭžo panižanaha indyvidualnaha taryfu.

Taki padychod aznačaŭ pieranos na «Klin Enierdžy Hrup Bieł» finansavaj nahruzki pryniataha ŭradam rašeńnia ab padtrymcy «Biełšyny», što «pry ŭstalavanaj dla «Klin Enierdžy Hrup Bieł» canie na haz robić prajekt nieakupnym». U zapiscy prapanoŭvalisia čatyry varyjanty vychadu ź situacyi.

U vyniku na ŭzroŭni ŭrada była pryniataja prapanova dać «Klin Enierdžy Hrup Bieł» źnižku na pryrodny haz sumaj 33% (z 276 da 185 dalaraŭ za 1 tys. kub. m).

Pavodle acenak «Biełpoł», takaja źnižka na karyść kampanii Mašenskaha «ekvivalentnaja 4,7 młn rubloŭ u hadavym vyličeńni» — abo bolš za 2,1 młn dalaraŭ pavodle abmiennaha kursu ŭ 2018‑2019 hadach.

Sa spasyłkaj na buchhałtarskija dakumienty «Klin Enierdžy Hrup Bieł» «Biełpoł» adznačaje, što prybytak kampanii za 2024 hod skłaŭ bolš za 5,5 młn rubloŭ (blizu 1,9 młn dalaraŭ). Pry hetym u apublikavanych dakumientach paznačana, što «padatak na prybytak za 2024 hod [kampanii] nie naličvaŭsia».

Taksama ŭ rasśledavańni pryvodzicca słužbovy list, adrasavany Łukašenku ŭ 2019 hodzie premjer-ministram Siarhiejem Rumasam i staršynioj Kamiteta dziaržkantrolu Leanidam Anfimavym. U dakumiencie paviedamlajecca, što «elektrazabieśpiačeńnie «Biełšyny» ad enierhietyčnaha kompleksu «Klin Enierdžy Hrup Bieł» pryviadzie da vypadajučych dachodaŭ elektrazabieśpiačalnych arhanizacyj sumaj blizu 7,5 młn rubloŭ na hod».

Akramia taho, Rumas i Anfimaŭ infarmavali adrasata, što «zakanadaŭstva nie praduhledžvaje ŭstanaŭleńnie indyvidualnych cenaŭ na pryrodny haz dla kankretnych subjektaŭ haspadarańnia».

U suviazi z hetym, vynikaje ź lista, čynoŭniki prapanavali Łukašenku nastupnuju schiemu: kampanija Mašenskaha pieradaje ŭ arendu babrujskamu pradpryjemstvu enierhietyčny kompleks i «akazvaje pasłuhi pa jaho ekspłuatacyi svaim piersanałam» — «Biełšyna» ž «z dapamohaj płaty za arendu i pasłuhi pa ekspłuatacyi pakryvaje vydatki inviestaru». Źnižka na haz pry hetym ustanaŭlivajecca dla dziaržpradpryjemstva.

Łukašenka ŭchvaliŭ prapanovu Rumasa i Anfimava, adznačaje «Biełpoł», spasyłajučysia na buchhałtarski spravazdaču «Klin Enerdžy Hrup Bieł».

Na dumku aŭtaraŭ rasśledavańnia, «tolki ŭ durnoha zastanucca sumnievy, ci adnosicca Mašenski da katehoryi hamancoŭ režymu», bo heta «nie što inšaje, jak vyklučnyja ekanamičnyja prefierencyi, jakija mnohija ŭparta sprabujuć nie zaŭvažać».

• 4
• 0
• 0
• 0
• 0
• 0
• 3
• 0