Kala Minska na darohach ustanavili «bierlinskija paduški». Što heta takoje?
Na abnoŭlenaj aŭtadarozie za MKAD, jakaja viadzie z boku holf-kłuba ŭ napramku Kałodziščaŭ, zaŭvažyli niezvyčajnyja štučnyja niaroŭnaści.
Tut jany prymianiajucca nie ŭpieršyniu ŭ Biełarusi, ale ŭsio ž dla bolšaści našych kiroŭcaŭ takija «lažačyja palicejskija» — navinka, piša Onliner.by.
Takija štučnyja niaroŭnaści tradycyjna nazyvajuć «bierlinskimi paduškami» (Berliner Kissen pa-niamiecku), bo ličycca, što prydumali i pačali masava vykarystoŭvać ich u Bierlinie jašče ŭ kancy 1980‑ch — pačatku 1990-ch.
Pa sutnaści, heta pramavuholny trapiecapadobny «vostraŭ», ustanoŭleny pasiaredzinie pałasy ruchu. Pamiery zvyčajna składajuć kala 1,6—1,8 m u šyryniu i 3—4 m u daŭžyniu, vyšynia — 7—10 sm.
I, u adroźnieńnie ad zvyčajnaha «lažačaha palicejskaha», takaja «paduška» zajmaje nie ŭsiu šyryniu darohi, a tolki jaje centralnuju častku.
Ideja ŭ tym, što lehkavym aŭtamabilam daviadziecca źnižać chutkaść — abjechać niaroŭnaść nie atrymajecca. A voś aŭtobusy, hruzavy i śpiecyjalny habarytny transpart dziakujučy bolšaj šyryni kalainy mohuć prajechać amal bieśpieraškodna, prapuskajučy «padušku» pamiž kołaŭ. Matacyklistam i ravarystam taksama zručna — lohka abjazdžajuć takuju niaroŭnaść zboku.
U vyniku taki vid štučnaj niaroŭnaści choć i ŭpłyvaje na źnižeńnie chutkaści transpartnaha patoku, ale robić heta bolš dakładna. Akramia taho, jak pryniata ličyć, mienš znošvaje padviesku mašyn, kali tyja zapavolilisia da pravilnaj chutkaści.
U Jeŭropie «bierlinskija paduški» dahetul vykarystoŭvajucca ŭ mnohich krainach, u pryvatnaści, ich prymianiajuć u žyłych kvartałach, kala dziciačych i navučalnych ustanoŭ, a taksama na vulicach z aktyŭnym tranzitnym trafikam. Darečy, tam heta tolki dadatkovaja miera, bo ahulnaja tendencyja va mnohich haradach — miakkija mietady prytarmažeńnia ruchu, takija jak zvužeńnie prajeznaj častki, pryŭźniatyja skryžavańni i kompleksnaje pieraasensavańnie vuličnaj prastory.
«Kali b u Biełarusi ŭsio było dobra, to vašy b nie jechali siudy pa kaŭbasu». Repartaž z prymiežnych Babroŭnikaŭ14
Kamientary