Polšča ŭviała sankcyi suprać «dački» Biełaruskaj cemientnaj kampanii
MUS Polščy nakłała nacyjanalnyja sankcyi na polskuju «dačku» «Biełaruskaj cemientnaj kampanii» (BCK) — firmu Białoruska Kompania Cementowa — Polska sp. z o.o.. Rašeńnie pryniata pa zajavie Nacyjanalnaj padatkovaj administracyi, piša Most.
U zajavie skazana, što 100% akcyj polskaj kampanii naležyć biełaruskamu chołdynhu z ofisam u Minsku. A jon, u svaju čarhu, abjadnoŭvaje bujnyja dziaržaŭnyja pradpryjemstvy, što vyrablajuć cemient.
U śniežni 2023 hoda na BCK nakłali sankcyi ZŠA. U Polščy kiraŭničuju kampaniju chołdynhu ŭnieśli ŭ sankcyjny śpis 22 lipienia 2025 hoda — za supracoŭnictva z Rasijaj. Jak adznačana ŭ zajavie, BCK pastaŭlaje tudy tavary, «jakija ŭ značnaj stupieni spryjajuć funkcyjanavańniu ekanomiki, skiravanaj na vajskovuju pramysłovaść».
Na dumku padatkovaha viedamstva, dziejnaść polskaj kampanii «niepasrednym čynam spryjaje raźvićciu i prybytku jaje biełaruskaha akcyjaniera». Tamu jość padstavy adnieści firmu da liku subjektaŭ, što padtrymlivajuć ahresiju Rasii suprać Ukrainy.
«Pryniaćcie abmiežavalnych mier u dačynieńni da Białoruska Kompania Cementowa Polska sp. z o.o. pryviadzie da źmianšeńnia ekanamičnych resursaŭ Biełarusi, z vykarystańniem jakich viadziecca ahresija suprać Ukrainy», — havorycca ŭ zajavie kiraŭnika Nacyjanalnaj padatkovaj administracyi.
Rašeńnie ab nakładańni sankcyj praduhledžvaje zamarozku ŭsich aktyvaŭ kampanii, zabaronu na pieradačy joj lubych resursaŭ i zabaronu dziejańniaŭ, skiravanych na abychod abmiežavańniaŭ. Taksama polskaja «dačka» BCK nie budzie dapuščanaja da ŭdziełu ŭ tendarach u Polščy.
Kolki sioleta tracili na viasielli ŭ Biełarusi? Sabrali realnyja ličby tych, chto pabyvaŭ u ZAHSie6
Kamientary