Kampanija-adnaroh ź biełaruskimi karaniami zapłacić miljony dalaraŭ za złoŭžyvańnie asabistymi danymi
Google i Flo Health pahadzilisia vypłacić ahułam $56 młn, kab urehulavać kalektyŭny pazoŭ, paviedamlaje Devby.io. Ich abvinavačvali ŭ zbory adčuvalnych miedycynskich danych miljonaŭ žančyn i vykarystańni ich dla tarhietynhu rekłamy z parušeńniem pryvatnaści karystalnic.
Umovy miravoha pahadnieńnia byli pradstaŭleny 23 vieraśnia viečaram u Fiederalnym sudzie San-Francyska. Ciapier jany pavinny atrymać uchvaleńnie sudździ Džejmsa Donata.
Zhodna z dakumientami, Google vypłacić $48 miljonaŭ, a Flo — $8 miljonaŭ. Kampanija Flurry, jakaja bolš nie isnuje, a raniej zajmałasia mabilnaj analitykaj, jašče ŭ sakaviku ŭrehulavała pretenzii na $3,5 miljony.
Čaćviorty adkazčyk — Meta — ad ździełki admoviłasia i dajšła ŭ sud, a 4 žniŭnia paśla dvuchtydniovaha razboru była pryznanaja vinavataj. Kampanija źbirajecca padać apielacyju, a słuchańnie pa vyznačeńni sumy škody pryznačanaje na 30 vieraśnia.
Google pajšła na ździełku za dva tydni da pačatku pracesu, Flo — užo bližej da jaho kanca. Pry hetym abiedźvie kampanii nie pryznajuć siabie vinavatymi.
Karystalnicy śćviardžali, što ŭ pieryjad ź listapada 2016 hoda da lutaha 2019 hoda Flo dzialiłasia asabistymi źviestkami pra mienstruacyi i ciažarnaści ź inšymi adkazčykami, choć abiacała zachoŭvać usio ŭ tajamnicy. Pazoŭniki spasyłalisia na zakon Kalifornii ab niedatykalnaści pryvatnaha žyćcia. Pa im za kožnaje parušeńnie moža pryznačacca štraf u $5 tysiač, što ŭ teoryi mahło abiarnucca šmatmiljardnymi vypłatami.
Flo — heta IT-kampanija, jakuju stvaryli biełarusy. Jana dabiłasia pośpiechu, raspracavaŭšy papularny dadatak dla žanočaha zdaroŭja. Hałoŭny ofis kampanii ciapier mieścicca ŭ Vilni, štab-kvatera — u Łondanie, pradstaŭnictvy — u Niderłandach i ZŠA. Minski ofis ciapier zakryty.
Flo — druhaja kampanija-adnaroh ź biełaruskimi karaniami. Pieršaj u 2021 hodzie stała PandaDoc.
Foty z Maskvy dajuć pabačyć Pucina i Łukašenku biez hrymu15
Kamientary