Paśla rekanstrukcyi adkryłasia adna z najstarejšych škoł Minska — SŠ №4 na Čyrvonaarmiejskaj, 11. Jak źmianiŭsia histaryčny budynak, raskazvajuć Minsk-naviny.
Škole №4 na Čyrvonaarmiejskaj u nastupnym hodzie spoŭnicca 120 hadoŭ. U 1906 hodzie heta była minskaja pryvatnaja mužčynskaja himnazija, a ŭ 1918 jaje rearhanizavali ŭ škołu № 4. U budynku na vulicy Čyrvonaarmiejskaj čaćviortaja škoła raźmiaščajecca z 1936 hoda.
U vajenny čas budynak mocna paciarpieŭ, zastalisia tolki fasadnyja ścieny. Ale paśla vajny jaho adnavili, zachavaŭšy histaryčny fasad, na jakim zastalisia dekaratyŭnyja elemienty — kałonny porcik, karnizy, pilastry, kapiteli. A ŭnutry z tych časoŭ zachavałasia marmurovaja leśvica ź mietaličnymi parenčami.
U hetym navučalnym hodzie adna z najstarejšych škoł adkryłasia paśla rekanstrukcyi. Raskazvajuć, što pry rekanstrukcyi dojlidy znajšli niamieckija mietaličnyja belki, datavanyja 1894 hodam. Ich pakinuli. Adna z hałoŭnych źmien — ciapier u škole źjaviŭsia ekspłuatavany dach. Padčas ramontu jaho ŭzmacnili dadatkovymi kanstrukcyjami — i ciapier tam pravodziać uroki fizkultury.
— I dazvolili nam zajmacca. Heta bolš čym kaštoŭnaje nabyćcio, bo ŭ našaj škoły nie było ŭłasnaha stadyjona, — raskazała žurnalistam namieśnica dyrektara SŠ № 4 Kaciaryna Šachoćka. — Na ŭroki fizkultury dzieci chadzili ŭ park Horkaha. Ciapier jość biehavaja darožka, placoŭka dla mini-futboła. Źjavilisia vuličnyja trenažory, zajmacca na jakich možna navat u niepahadź. Jany znachodziacca ŭ arcy prybudovy, tam jość i tenisnyja stały.
Jašče ŭ škole jość bałkony i rekreacyi ź vialikimi panaramnymi voknami. A ŭ chole — muzyčnaja haścioŭnia, u jakoj staić rajal.
Ciapier čytajuć
«U kapciuroch HPU». Stahodździe niebiaśpiečnaj naiŭnaści i daremnych maraŭ biełaruskaj emihracyi6
Kamientary