Biełaruska atrymała polskuju vizu, ale nie pačała pa joj jeździć da zakryćcia miažy. Ci puściać jaje ciapier u ES?
Karystalnica tyktoka ź nikam @lalka.bu atrymała polskuju vizu da taho, jak susiedniaja kraina całkam zakryła miažu ź Biełaruśsiu. Adnak skarystacca ź jaje nie paśpieła. Žančyna zachvalavałasia, što pieršy raz ujechać pa takim šenhienie jana moža tolki praz Polšču. Ale ci tak heta? «Lusterka» spytała ŭ vizavaj ekśpiertki Anastasii Łysakoŭskaj.
Pa słovach uładalnicy polskaj vizy, jana pačynaje dziejničać z 15 kastryčnika. Adnak žančyna nie ŭpeŭnienaja, što da hetaj daty Polšča adkryje miažu.
«U mianie viza «nieraśpiačatanaja». A «raśpiačatać» ja jaje mahu tolki na polskaj miažy, pravilna? — zadajecca pytańniem błohierka. — Ja ž nie pajedu z polskaj vizaj [pieršy raz] praź Litvu. Heta pipiec niejki».
U kamientarach žančynie patłumačyli, što pa novaj šenhienskaj vizie možna zajazdžać u lubuju krainu Šenhienskaha pahadnieńnia. Niezaležna ad taho, chto vydavaŭ vizu. Heta ž paćviardžaje i Anastasija Łysakoŭskaja.
«Nijakaha «praviła pieršaha ŭjezdu» nie isnuje. Atrymaŭšy vizu ŭ konsulstvie adnoj krainy, vy možacie zajechać u Šenhienskuju zonu praź lubuju inšuju, — tłumačyć jana. — Da taho ž jość krainy ES, jakija nie miažujuć ź Biełaruśsiu, ale vydajuć šenhien našym hramadzianam. Naprykład, Hiermanija.
U takich vypadkach turyst spakojna moža ŭjazdžać siudy praź lubuju dziaržavu šenhiena, jakaja miažuje ź joj, abo prylacieć, dapuścim, z Turcyi. Bo ź Biełarusi ciapier nie zastałosia mahčymaści trapić u Polšču niepasredna, značyć, čałaviek moža adpraŭlacca tudy inakš. Vykažam zdahadku, praź Litvu ci Łatviju».
Śpiecyjalistka adznačaje, što pry hetym nie važna, turystyčny Šenhien u čałavieka, abo nacyjanalnaja ci pracoŭnaja viza. Ni ŭ jakim z hetych vypadkaŭ pytańniaŭ praz «nieraśpiačatanuju» vizu da jaho nie budzie.
«Adnak isnuje tak zvanaje praviła asnoŭnaj krainy (uskosna heta prapisana ŭ art. 5 Vizavaha kodeksa ES. — Zaŭv. «Lusterka»), — adznačaje Anastasija Łysakoŭskaja. — Sutnaść jaho ŭ tym, što padčas pajezdki bolšuju častku času zajaŭnik pavinien pravieści ŭ dziaržavie, jakaja vydała vizu».
Kali ž čałaviek vyrašyć paŭtorna padavacca na šenhien krainy, jaki ŭžo mieŭ, ci stanie konsulstva praviarać, ci byvaŭ jon u hetaj dziaržavie? Heta zaležyć ad ustanovy, kaža śpiecyjalistka. Adnyja praviarajuć, inšyja nie.
«Vienhryja hladzić. Pryčym zrabić heta jany mohuć jašče na momancie vyjezdu čałavieka z krainy. Jany daviedajucca, ci zasialaŭsia jon u nazvany hatel. Kali nie, mohuć anulavać biahučuju vizu, — pryvodzić prykład surazmoŭca. — Hiermanija i Italija pry paŭtornaj padačy prosiać prykłaści paćviardžeńnie znachodžańnia tam. Dapuścim, čeki, fota. Kali takich dokazaŭ niama, vierahodna, vizu na doŭhi termin jany vam nie daduć».
A jak na heta hladziać u konsulstvie Polščy? Pa vopycie Anastasii, pry paŭtornaj padačy nie patrabujuć dokazaŭ, što zajaŭnik, jaki mieŭ polski šenhien, znachodziŭsia ŭ krainie.
«Bolš hladziać, ci była ŭ čałavieka da hetaha polskaja viza. Kali tak, to šancy atrymać šenhien hetaj krainy pavialičvajucca», — reziumuje jana.
Biełaruska zrabiła novy pašpart, a jon akazaŭsia niesapraŭdnym: Daviedałasia pra heta ŭ aeraporcie
Jak ciapier možna vyjechać i zajechać u Jeŭrasajuz, kali polskaja miaža zakrytaja?
Jak prachodzić ujezd u Łatviju pa novych praviłach. Raskazvajuć vidavočcy
Kiejs Kotava znoŭ aktualizavaŭ pytańnie, kudy niebiaśpiečna jechać biełarusam, jakija aścierahajucca pieraśledu
Ekśpiert patłumačyŭ, kali varta pačynać rabić šenhienskuju vizu, kab trapić na adpačynak u Jeŭropu
Ciapier čytajuć
Što aznačaje rasśledavańnie Mižnarodnaha kryminalnaha suda dla Łukašenki i biełarusaŭ? Tłumačyć Kaciaryna Dziajkała9
Kamientary