Dziaŭčyna z «kavunovaha bataljona» Łukašenki atrymała ŭ Rymie prapanovu ruki i serca. Chto ž žanich?
Ramantyčna, ale niepatryjatyčna: štatnaja pryhažunia Łukašenki Jana Baranoŭskaja aficyjna stała niaviestaj. Piarścionak z dyjamientam jana atrymała nie dzie-niebudź, a ŭ darahim restaranie ŭ stalicy Italii.
Jana Baranoŭskaja ŭdzielničała ŭ konkursie «Mis Biełaruś» u 2021 hodzie. Dziaŭčyna stała «štatnaj pryhažuniaj» Alaksandra Łukašenki.
Jana naviedvaje łukašenkaŭskija bali, zaŭzieje za palityka na chakiei, a jašče padnosić tamu kvietački. Pryhažunia rehularna ŭdzielničaje ŭ mierapryjemstvach razam z Łukašenkam.
Niekalki dzion tamu, naprykład, była na «Mis Biełaruś», ale ŭ hety raz siarod hledačoŭ. U chutkim časie paśla šou dziaŭčyna palacieła ŭ Rym z kachanym.
Abrańnik Jany — Vital Astroŭski. Amal vosiem hadoŭ jon adpracavaŭ u Nacyjanalnym alimpijskim kamitecie Biełarusi, apošnija hady byŭ kiraŭnikom adździeła markietynhu.
Ale sioleta Vital źmianiŭ miesca pracy — ciapier pracuje ŭ budaŭničaj kampanii «Dana Astra». Sychodziačy z NAK, jon zrabiŭ u instahramie dopis, u jakim asabista padziakavaŭ Viktaru Łukašenku. Kaža, toj pavieryŭ u jaho i daŭ mahčymaść realizavacca ŭ prafiesijnym płanie, «zaŭsiody padtrymlivaŭ i davaŭ mahčymaść atrymać biascenny vopyt».
Ad stalicy Italii Jana ŭ zachapleńni: jana dzialiłasia zdymkami z Vatykanu, całavałasia sa svaim chłopcam la Kalizieju… Kazała, što dzień ich byŭ napoŭnieny «pryhažościu, kachańniem, biaskoncymi prahułkami i smačnaj ježaj».
Paviačerać para sieła ŭ restaracyju ź vidam na Panteon. Skončyŭsia ramantyčny viečar prapanovaj ruki i serca. Jana ŭ storys pachvaliłasia tym, što na jaje bieznazoŭnym palcy źjaviŭsia piarścionak z dyjamientam.
Imavierna, zaprašeńnie na viasielle atrymaje i Uładlena Zajcava, bo raniej dziaŭčaty nie adnojčy tusavalisia razam. Siarod siabrovak Jany Baranoŭskaj jość i inšyja ŭdzielnicy konkursu «Mis Biełaruś» — Darja Hančarevič i Maryja Vasilevič. Maryja, darečy, sioleta taksama pabrałasia šlubam.
Kamientary