Śpiavaje ŭ karaokie, śniedaje ŭ Drazdach. Čym zajmajecca ŭ volny čas favarytka Łukašenki Uładlena Zajcava
«Aficer» Uładlena Zajcava lataje z Łukašenkam u Dubaj, tančyć na bałach i apładziruje jamu na chakiei. Ale čym zajmajecca maładaja dziaŭčyna ŭ toj čas, kali nie supravadžaje jaho na roznych mierapryjemstvach?
Sama Uładlena z Mahilova, joj 26 hadoŭ. Dziaŭčyna skončyła spačatku mahiloŭskuju škołu №5, potym Mahiloŭski dziaržaŭny ŭniviersitet imia Arkadzia Kulašova. Dypłom abaraniła pa temie «Abaviazki najmalnika pa zabieśpiačeńni biaśpiečnych umoŭ i achovy pracy: niekatoryja prablemy teoryi i praktyki», paśla praciahnuła navučańnie ŭ mahistratury i pajšła pracavać na mytniu.
Uładlena nieadnarazova ŭdzielničała ŭ roznych aficyjnych mierapryjemstvach, kali treba było, naprykład, uručać kvietki na ŭznaharodžańni rabotnikaŭ padatkovych orhanaŭ ci pieradać simvaličny kluč čynoŭniku ad novaj palikliniki.
Da pačatku svajho vip-žyćcia dziaŭčyna ź siabrami lubiła chadzić u zvyčajnaje karaokie ŭ Mahilovie, dzie, nie vielmi traplajučy ŭ noty, śpiavała «Ech, łuk-łučok, zołotaja łukovica…».
Cikava, što vosieńniu 2020 hoda, kali ŭłady hłušyli internet u centry Minska, Uładlena publikavała storys ź lesu i pisała: «Vychadnyja bieź internetu — najlepšaje, što moža być».
Možna ličyć, što zorka Uładleny zaźziała paśla ŭdziełu ŭ konkursie «Mis Biełaruś — 2021». Niahledziačy na toje, što karonu tady atrymała Darja Hančarevič, na Uładlenu źviarnuli ŭvahu. Užo ŭ śniežni taho ž hoda pryhažuni daručyli tančyć z Łukašenkam na Respublikanskim bali moładzi. Potym jany nie adnojčy źjaŭlalisia razam na publicy.
Vyhladaje, što vosieńniu 2022 hoda Uładlena taksama supravadžała Łukašenku padčas jaho pieršaha aficyjnaha vizitu ŭ Abchaziju.
Fota na marskim uźbiarežžy dziaŭčyna apublikavała prykładna praź miesiac paśla vizitu. Ale, miarkujučy pa videa pryjezdu Łukašenki (prybyła delehacyja moram), jakoje raspaŭsiudžvali abchazskija ŚMI, sfatahrafavałasia Uładlena niedaloka ad pryčała, ad jakoha palityk išoŭ da rezidencyi kiraŭnika Abchazii Asłana Bžanii. Nadvorje i na fota, i na videa taksama supadaje.
Konkurs «Mis Biełaruś — 2021» padaryŭ Uładlenie nie tolki ŭpłyvovaha zastupnika, ale i šmat siabrovak. Ź niekatorymi ź ich jana praciahvaje kamunikavać i ciapier i razam chodzić pa darahich restaranach — naprykład, u «Labiadziny». Adna ź siabrovak z tych časoŭ — madel Jana Baranoŭskaja. Razam ź joj, naprykład, Uładlena katajecca na rolikach, chodzić na kancerty, a taksama adpačyvaje ŭ Rosé Bar i inšych miescach.
Na śniadanki Zajcava čas ad času zachodzić u kafe «Kantrast», jakoje znachodzicca ŭ Drazdach. Dzień Niezaležnaści ŭ 2022 hodzie jana pajšła adśviatkavać u znakamituju «Biarozku» ŭ centry stalicy. U rodnym Mahilovie dziaŭčynie padabajucca restarany «Cokal» i «Šale».
A jašče pryhažunia lubić tančyć na kancertach Aleha Majami (pryznajecca, što ŭ studenckija hady joj bolš za ŭsio padabałasia jaho pieśnia «Nanova»), Zivert, Siarhieja Łazarava, Anna Asti i Filipa Kirkorava.
Zdajecca, 2024 hod Uładlena sustrakała ŭ Maskvie, bo 31 śniežnia vykładała videa z zaśniežanaj rasijskaj stalicy.
Kamientary