Polski fiermier raskazaŭ, jak nabyŭ traktar Belarus, a ciapier pakutuje
33-hadovy fiermier Maryjuš Maksimovič z padlašskaj vioski Srednica zajmajecca sielskaj haspadarkaj ź dziacinstva. Razam z baćkami jon viadzie haspadarku na 30 hiektarach i ŭtrymlivaje 80 karoŭ. U 2018 hodzie siamja kupiła traktar Belarus za 200 tysiač złotych (pa tahačasnym kursie kala 55 tysiač dalaraŭ). Kupla była lehalnaj: jość usie dakumienty, paćviardžeńni płaciažoŭ i mytaŭ, paśviedčańni ab rehistracyi techniki ŭ kamunikacyjnym adździele. Ale praz hady lehalnaha vykarystańnia traktara ŭźnikli prablemy, piša biełastocki rehijanalny sajt.
Za hetyja hady traktar zaśviedčyŭ siabie, śćviardžaje Maryjuš, jak davoli nadziejnaja, choć i nie nadta kamfortnaja technika. U adroźnieńnie ad zachodnich madelaŭ, jakija patrabujuć darahoha servisu i kampjutarnaha absłuhoŭvańnia, Belarus lohka ramantujecca samastojna, a zapčastki dastupnyja praktyčna ŭ kožnaj kramie.
Dziakujučy hetamu traktaru siamja Maryjuša pavialičyła vytvorčaść małaka, palapšała ahulnuju efiektyŭnaść haspadarki. Jana vykarystoŭvaje jaho ź inšymi sielskahaspadarčymi pryładami: płuham, siejałkaj, raskidalnikam hnoju.
Adnak u listapadzie 2024 hoda Maryjuš atrymaŭ list ad ad miascovych uładaŭ: rehistracyju jaho traktara anulujuć nibyta z-za adsutnaści omałahacyi. Paśla niekalkich abskardžvańniaŭ kančatkovaje, niespryjalnaje dla fiermiera rašeńnie było vyniesiena ŭ žniŭni 2025 hoda. Heta aznačaje, što jon ciapier nie moža zakonna vyjazdžać na darohi, u toj čas jak akurat ciapier čas žniva.
Prablema maje i palityčny aśpiekt. Padčas pieradvybarčaj kampanii ciapierašni ministr infrastruktury Daryjuš Klimčak abiacaŭ lehalizavać takija traktary i dać harantyi fiermieram, što jany zmohuć pracavać dalej. Ale paśla vybaraŭ hetyja abiacańni, jak śćviardžajecca, byli zabytyja.
Tamu Maryjuš i jaho siamja ciapier ryzykujuć stracić asnoŭny pracoŭny instrumient i srodki dla isnavańnia. Jany vymušanyja dla taho, kab skončyć žnivo, šukać dapamohu ŭ susiedziaŭ, i spadziajucca, što ŭłady ŭsio ž vykanajuć svaje abiacańni.
Pradstaŭnik Ruchu siamiejnych haspadarak, prafiesijnaha abjadnańnia fiermieraŭ, adznačaje, što situacyja Maryjuša Maksimoviča nie ŭnikalnaja — z padobnymi prablemami sutyknulisia 7 500 fiermieraŭ pa ŭsioj Polščy.
Kupla traktaroŭ ź Biełarusi pryniesła prablemy polskim fiermieram
Dyrektarka etałonnaha kałhasa ŭ Dobrušy 12 hadoŭ chavała padziež i źbivała padnačalenych. Adnaho sprabavała nakarmić siłasam
«Hiektar prynosić kala $20 000». Bujakovy fiermier raskazaŭ, jak možna zarabić na jahadach u Biełarusi
Čaho chočuć jeŭrapiejskija fiermiery?
Kamientary