Były ministr zamiežnych spraŭ Ukrainy vyjechaŭ za miažu i vostra raskrytykavaŭ Zialenskaha
Były ministr zamiežnych spraŭ Ukrainy Dźmitryj Kuleba raskazaŭ italjanskamu vydańniu Corriere della Sera, što z-za vydańnia prezidentam Ukrainy Uładzimiram Zialenskim ukaza ab zabaronie na vyjezd z krainy byłym dypłamatam vymušany byŭ terminova pakinuć krainu i ciapier znachodzicca ŭ Polščy, u Krakavie.
Aficyjnaj pryčynaj pajezdki Kuleby za miažu byŭ udzieł u kanfierencyi ŭ Paŭdniovaj Karei, ale na samaj spravie jon vyjechaŭ za niekalki hadzin da ŭstupleńnia ŭ siłu ŭkaza prezidenta Uładzimira Zialenskaha, jaki zabaraniaje vyjezd z Ukrainy dla byłych dypłamataŭ.
Kuleba adznačaje, što hety ŭkaz nie źviazany z vajennym stanoviščam, jakoje zabaraniaje mužčynam va ŭzroście da 60 hadoŭ vyjezd z krainy, bo byłyja dypłamaty nie abaviazanyja słužyć u vojsku.
Jon upeŭnieny, što zabarona nakiravanaja asabista suprać jaho i jašče niekalkich asob, kab jany nie mahli vystupać za miažoj suprać palityki ŭrada.
Niemahčymaść vyjazdžać dla Kuleby — surjoznaja prablema, bo jon vykładaje palityčnyja navuki ŭ Paryžy i ZŠA i časta ŭdzielničaje ŭ mižnarodnych kanfierencyjach. Jon padkreślivaje, što jahonyja dachody zaležać ad pracy za miažoj i što jon, u cełym, abaraniaje ŭrad Ukrainy. Adnak u niekatorych kołach va ŭkrainskaj uładzie jašče, maŭlaŭ, isnuje savieckaje myśleńnie: kali čałaviek jedzie za miažu, jaho adrazu ličać ahientam, jaki składaje zmovy suprać dziaržavy.
Kuleba taksama zhadvaje, što ŭ minułym hodzie ŭkrainskija ŭłady pieraśledavali byłoha prezidenta Ukrainy Piatra Parašenku, stvaralnikaŭ žurnalisckich rasśledavańniaŭ i sprabavali zakryć kamisii pa rasśledavańni karupcyi. Jon ličyć, što asabista staŭ abjektam cisku za toje, što adkryta krytykavaŭ sproby ŭrada cenzuravać hetyja kamisii.
Kuleba padkreślivaje:
«Hramadzianie śviadoma vyrašyli abmiežavać krytyku dziela adzinstva ŭ imia vajennych patreb. Ale ciapier Zialenski nie maje prava karystacca hetym, kab zahłušyć luby hołas, jaki adroźnivajecca ad jahonaha».
U pres-słužbie Kuleby paźniej zajavili vydańniu Hromadske, što słovy eks-ministra byli «padadzienyja niekarektna». Toj, jak śćviardžajecca, vyjechaŭ u Polšču, kab adpravicca na kanfierencyju ŭ Paŭdniovuju Kareju, i vierniecca va Ukrainu 20 vieraśnia, kažuć jaho pradstaŭniki.
Dźmitryj Kuleba byŭ ministram zamiežnych spraŭ Ukrainy z 4 sakavika 2020 hoda da 5 vieraśnia 2024-ha. Da hetaha jon z 29 žniŭnia 2019 hoda jon byŭ vice-premjeram i ministram Ukrainy pa pytańniach jeŭrapiejskaj i jeŭraatłantyčnaj intehracyi.
Ciapier čytajuć
«Ty ŭ nas u Biełarusi!» — «Ja mamu tvaju ja*aŭ». Hościu z Ałtaja nie spadabałasia zaŭvaha za kinuty ŭ centry Minska niedakurak27
Kamientary
Ale heta moža być i hulnia, raskrutka zahadzia zaćvierdžanaj asoby na pasadu prezydenta, kab nie dazvolić Maskvie prapichnuć svajho.