Alaksandr Łukašenka-małodšy staŭ suzasnavalnikam pryvatnaj kampanii. Heta pieršy zafiksavany vypadak, kali chtości niepasredna ź siamji kiraŭnika Biełarusi naŭprost vałodaje pryvatnym biznesam, piša «Biuro».
Kampanija «Siezon upakoŭki» źjaviłasia 2 červienia 2025 hoda. Dvaccacihadovamu Alaksandru Łukašenku — małodšamu naležyć 20%. Astatnimi 80% vałodaje firma «Marskija siezony», jakuju stvaryła biznes-łedzi Ludmiła Niaronskaja — blizkaja siabroŭka Viktara i Lilii Łukašenkaŭ.
Niadaŭna raskazvałasia, jak Niaronskaja dziakujučy siabroŭstvu ź siamjoj starejšaha syna Łukašenki zarablaje na rybnym biznesie ŭ Biełarusi i Rasii. Nahadajem, što ŭ «Marskich siezonach» pracaŭładkavany i muž starejšaj unučki Łukašenki Viktoryi Łukašenki — Dźmitryj Dziatłaŭ.
«Siezon upakoŭki» ŭnuka Łukašenki budzie zajmacca vytvorčaściu hafravanaj papiery i kardonu, papiarovaj i kardonnaj tary. Pry rehistracyi kampanija paznačyła ŭ jakaści jurydyčnaha adrasa admysłovuju ekanamičnuju zonu «Bremina-Orša», jakaja ŭ narodzie viadomaja jak «aršanski afšor» za košt šyrokich ilhot i prefierencyj, jakimi jaje nadzialiŭ Łukašenka asabista svaim ukazam.
Praz tydzień paśla stvareńnia kampanija «Siezon upakoŭki» źmianiła adras rehistracyi i ciapier bazujecca ŭ administracyjnym kompleksie budynkaŭ u pasiołku Bałbasava na terytoryi «Bremina-Oršy», dzie značacca firmy «kašalkoŭ» Łukašenki: «Bremina hrup», «Ardzita», «Ruzekśpiedycyja» i «Ścischo».
Ci ŭvajšła kampanija «Siezon upakoŭki» ŭ skład admysłovaj ekanamičnaj zony, kab karystacca šmatlikimi lhotami i prefierencyjami ad dziaržavy, pakul dakładna nie viadoma. Reč u tym, što ŭ červieni, nieŭzabavie paśla rehistracyi firmy, jakoj sumiesna vałodaje ŭnuk Łukašenki, apieratar AEZ — «Bremina hrup» — niečakana schavaŭ raniej publičny śpis rezidentaŭ.
«Toje, što ŭsio vakoł Łukašenki zaviazanaje na siamju, niadziŭna, kali ŭličyć, što kiraŭnik režymu Biełarusi nie maładzieje. Dziŭna, viadoma, pastavić u biznes unuka z takim imiem, tamu što chočaš nie chočaš — heta vidavočnaja suviaź u płanie palityčna afilavanych ludziej, tamu što ŭ krainach, jakija kirujucca pryncypami svabodnaha rynku, prazrystaści, pravavoj dziaržavy, takaja blizkaść da palityčnaj viertykali adrazu vyklikała b dadatkovyja pytańni. I heta naviazvaje dumku, što nichto ŭ atačeńni siamji Łukašenki surjozna i nie razhladaje niejkija inšyja alternatyvy [supracoŭnictva], aprača Rasii, Kitaja i padobnych krain», — prakamientavaŭ «Biuro» dacent Instytuta mižnarodnych adnosinaŭ i palityčnych navuk Vilenskaha ŭniviersiteta Vicis Jurkonis.
Kamientary