Eks-prezidenta Brazilii Bałsanaru adpravili pad chatni aryšt. Sud zajaviŭ, što jon parušyŭ zabaronu na karystańnie sacsietkami

Viarchoŭny sud Brazilii rasparadziŭsia źmiaścić byłoha prezidenta Žaira Bałsanaru, jakoha sudziać pa spravie ab sprobie dziaržaŭnaha pieravarotu, pad chatni aryšt za parušeńnie zabarony na vykarystańnie sacyjalnych sietak, piša Bi-bi-si.

U pastanovie sudździa Alešandra de Maraes zajaŭlaje, što eks-prezident karystaŭsia sacsietkami svaich prychilnikaŭ, u tym liku synoŭ-deputataŭ, dla raspaŭsiudžvańnia paviedamleńniaŭ, «jakija zaklikajuć da napadaŭ na Viarchoŭny fiederalny sud i adkryta padtrymlivajuć zamiežnaje ŭmiašańnie ŭ spravy brazilskaj sudovaj sistemy».

U niadzielu ŭ roznych haradach Brazilii prajšli mitynhi ŭ padtrymku Bałsanaru. Adzin ź jaho synoŭ, Fłavia, padčas akcyi na karotki čas uklučyŭ baćku na hučnuju suviaź, kab toj źviarnuŭsia da sabranych u Rya-de-Žanejra.

Paźniej jon taksama apublikavaŭ u instahramie videa, na jakim jaho baćka źviartajecca da prychilnikaŭ. Post paźniej byŭ vydaleny.

«Žachlivaje nievykanańnie nakładzienych abmiežavalnych mieraŭ było nastolki vidavočnym, što, paŭtorymsia, sam syn padsudnaha, sienatar Fłavia Nantes Bałsanaru, vyrašyŭ vydalić post sa svajoj staronki ŭ sacyjalnaj sietcy Instagram, kab schavać parušeńnie zakona», — napisaŭ Maraes.

Viarchoŭny sud taksama zabaraniŭ Bałsanaru prymać naviedvalnikaŭ, za vyklučeńniem advakataŭ abo asob, sankcyjanavanych sudom, a taksama karystacca mabilnym telefonam.

Raniej eks-prezidenta ŭžo abaviazali nasić elektronny branzalet, vykonvać kamiendanckuju hadzinu, nie karystacca sacsietkami i nie kantaktavać sa svaim synam Eduarda Bałsanaru, jaki, pavodle paviedamleńniaŭ, łabiruje jaho intaresy ŭ ZŠA i moža być blizki da prezidenta Donalda Trampa.

U pačatku lipienia Tramp abvinavaciŭ Braziliju ŭ «palavańni na viedźmaŭ» u suviazi sa spravaj suprać byłoha prezidenta i zajaviŭ, što jana pavinna być spynienaja. U adkaz prezident krainy Łuis Inasiu Łuła da Siłva nahadaŭ amierykanskamu lidaru pra niedapuščalnaść umiašańnia ŭ brazilskuju sudovuju sistemu. U červieni Žair Bałsanaru paŭstaŭ pierad sudom i adchiliŭ abvinavačańni ŭ sprobie dziaržaŭnaha pieravarotu i zmovie z metaj źviaržeńnia Łuły, jakomu jon prajhraŭ na vybarach u 2022 hodzie.

Zhodna z abvinavaŭčym zaklučeńniem, zmova, u jakoj, akramia Bałsanaru, udzielničali jašče siem čałaviek, u tym liku były ministr abarony i kiraŭnik raźviedki, pravaliłasia z-za adsutnaści padtrymki z boku vajskoŭcaŭ.

Vystaŭlenyja ŭ lutym hetaha hoda abvinavačańni taksama ŭklučajuć śćviardžeńni pra toje, što Bałsanaru płanavaŭ atrucić Łułu i zastrelić sudździu Viarchoŭnaha suda Alešandru de Maraesa. Hetyja abvinavačańni eks-prezident taksama adchiliŭ.

Bałsanaru i jaho mierkavanym saŭdzielnikam pahražajuć doŭhija turemnyja terminy ŭ vypadku pryznańnia ich vinavatymi.

• 1
• 2
• 0
• 0
• 0
• 0
• 0
• 0