Rasija naroščvaje vytvorčaść «šachiedaŭ» i nieŭzabavie zmoža zapuścić 2000 za adnu noč

Jak piša Business Insider, hienierał-major Kryścijan Frojdynh ź Ministerstva abarony Hiermanii zajaviŭ, što Kreml aktyŭna naroščvaje mahutnaści dla vytvorčaści bieśpiłotnikaŭ «Šachied». Pavodle jaho słoŭ, meta — «adnačasovy zapusk 2000 bieśpiłotnikaŭ», i suprać hetaha patrebnyja razumnyja i ekanamična efiektyŭnyja srodki supraćdziejańnia.

Rasija z pačatku 2023 hoda naładziła miascovuju vytvorčaść hetych dronaŭ u Jełabuzie, a niekatoryja kampanienty pastupajuć z Kitaja. Spadarožnikavyja zdymki pakazvajuć, što płošča vytvorčaści pavialičyłasia ŭdvaja z 2023 hoda. Vajennaja raźviedka Ukrainy taksama zafiksavała na asobnych detalach źbitych dronaŭ markiroŭki ź Ižeŭska — vierahodna, havorka pra jašče adnu vytvorčuju liniju.

Amierykanski instytut vyvučeńnia vajny (ISW) u svaju čarhu niadaŭna paviedamiŭ, što Rasija pastajanna pavialičvaje kolkaść «šachiedaŭ» i bieśpiłotnikaŭ-padmanak (biez vybuchoŭki), jakija jana zapuskaje za adnu noč. U červieni i lipieni rost skłaŭ 31% u paraŭnańni z papiarednim miesiacam. U pačatku lipienia za adnu noč była zapuščana ich rekordnaja kolkaść — 728 štuk.

Kamandzir ukrainskich Sił bieśpiłotnych sistem Robiert «Madziar» Broŭdzi papiaredziŭ, što chutka Rasija moža zapuskać 1000 i bolej dronaŭ štodnia.

U svaju čarhu analityki ISW adznačajuć, što Rasija zmoža dasiahnuć mety — zapuskać da 2000 dronaŭ za noč — užo da listapada 2025 hoda. Adnak jany ličać, što padtrymlivać taki temp pastajanna budzie niemahčyma.

Tym nie mienš, takaja mahutnaść budzie rezkim skačkom u paraŭnańni z vosieńniu 2024 hoda, kali Rasija zapuskała pa Ukrainie kala 2000 bieśpiłotnikaŭ štomiesiac.

U suviazi z rostam maštabaŭ napadaŭ Kijeŭ i jaho sajuźniki bajacca, što supraćpavietranaja abarona Ukrainy moža nie vytrymać cisku. Siońnia abarona hruntujecca na šmatsłajovaj sistemie: zienitnyja rakiety, pavietrany pierachop, mabilnyja ahniavyja hrupy z kulamiotami i ajčynnyja bieśpiłotniki-pierachopniki, takija jak «Stynh».

Niamiecki hienierał Frojdynh adznačyŭ, što suprać takoj kolkaści šachiedaŭ nielha spadziavacca na darahija zachodnija srodki pierachopu, takija jak Patriot. Patrebnyja značna tańniejšyja rašeńni, koštam 2—4 tysiačy jeŭra za adzinku. Dla paraŭnańnia, adna sistema Patriot kaštuje ŭradu ZŠA 1,1 miljarda dalaraŭ, a adna ź jaje rakiet moža kaštavać kala 4 miljonaŭ dalaraŭ.

Adnak sistemy Patriot nieabchodny dla źniščeńnia balistyčnych rakiet, jakija Rasija časta zapuskaje razam z «šachiedami».

Ukraina pieryjadyčna sprabavała nanieści ŭdary pa Jełabuzie z dapamohaj svaich bieśpiłotnikaŭ dalokaha radyusu dziejańnia, ale niezrazumieła, ci atrymali zavody jakija-niebudź značnyja paškodžańni.

• 0
• 0
• 0
• 0
• 1
• 1
• 2
• 0