Ceny na kvitki ŭ Vilniu ŭražvajuć. Čamu dabracca da Litvy našmat daražej, čym da Varšavy i Maskvy
Za apošnija niekalki miesiacaŭ ceny na kvitki ŭ «kryvickuju Miekku» znoŭ vyraśli. Vilnia, niekali takaja blizkaja, stała samym darahim kirunkam.
Samy darahi kirunak
Apošnim časam ceny na kvitki ź Minska da Vilni dachodziać da 190 rubloŭ (kala 55 jeŭra), i heta, napeŭna, samy darahi aŭtobusny maršrut ź Minska ŭ pieraliku na košt prajezdu adnaho kiłamietra. Jašče ŭ pačatku viasny možna było kupić kvitok za 140 rubloŭ.
U zvarotnym kirunku bilety, u zaležnaści ad pieravozčyka, kaštujuć ad 55 da 70 jeŭra (190—238 rubloŭ). I heta za pajezdku daŭžynioj 185 kiłamietraŭ.
Jakija ceny byli raniej? Viasnoj 2024 hoda ŭ Vilniu možna było dabracca za 120 rubloŭ (kala 35 jeŭra pa tahačasnym kursie). Letam minułaha hoda ŭžo za 140-150 rubloŭ. U 2023 hodzie kvitki naohuł kaštavali pa 70—80 rubloŭ u adzin bok.
Admietna, što dabracca ź Minska ŭ Varšavu kaštuje tańniej — ad 130 rubloŭ (mienš za 40 jeŭra). I heta pry tym, što adlehłaść ad Minska da Varšavy ŭ try razy bolšaja, čym da Vilni — 555 kiłamietraŭ suprać 185. Vilnia ž bližejšaja da Minska za luby biełaruski abłasny centr.
Anałahičnaja situacyja i ź inšymi haradami. Naprykład, z Hrodna da Vilni bilety kaštujuć 180 rubloŭ, a ŭ Varšavu — 150.
Čamu tak adbyvajecca?
Z ekanamičnaha punktu hledžańnia situacyja, kali ceny na kvitki da Vilni vyšejšyja, čym da Varšavy, vyhladaje absurdnaj, ale na cenaŭtvareńnie tut upłyvajuć nie ekanamičnyja čyńniki, a administratyŭnyja.
Reč u tym, što razam z zakryćciom punktaŭ propusku «Rajharad — Pryvałka» i «Łavaryški — Katłoŭka» z 1 sakavika 2024 hoda Litva vyrašyła skaracić kolkaść dazvołaŭ na pieravozku pasažyraŭ. Praz heta skaraciłasia kolkaść rejsaŭ pamiž krainami.
Taksama tady było zabaroniena pierasiakać miažu pieššu, na rovarach i samakatach.
Paźniej, užo z krasavika 2025 hoda, litoŭski bok zabaraniŭ pierasiakać miažu na matacykłach i inšych transpartnych srodkach, akramia lehkavych aŭto.
Usie hetyja i inšyja abmiežavalnyja zachady pavialičvajuć popyt na aŭtobusnyja pieravozki, što dazvalaje pieravozčykam pavyšać košt prajezdu.
Vydatnaja ilustracyja taho, nakolki zavyšany košt biletaŭ na aŭtobusnyja maršruty ź Biełarusi ŭ Litvu, — heta košt prajezdu ź Vilni ŭ inšyja harady Jeŭropy. Tak, naprykład, dabracca ź Vilni ŭ Varšavu (530 km) možna ŭsiaho za 35 jeŭra (kala 120 rubloŭ).
A ź Minska ŭ Maskvu (bolš za 700 km) možna dabracca ŭsiaho za 65—75 rubloŭ.
Ciapier čytajuć
Stała viadoma, dzie pracuje favarytka Łukašenki Uładlena Zajcava1
Kamientary
[Zredahavana]