Raskošny paŭnočnakarejski kurort dla zamiežnikaŭ zakryŭsia praz try tydni paśla adkryćcia
Paŭnočnakarejski dyktatar tolki 1 lipienia efiektna adkryŭ svoj novy kurort pierad telekamierami. Jon chvaliŭ prybiarežny kompleks Vansan-Kalma jak «adno z najbujniejšych dasiahnieńniaŭ hetaha hoda». I raptam — zamiežnym turystam ujezd zabaronieny.
Dziaržaŭny sajt DPR Korea Tour apublikavaŭ karotkaje paviedamleńnie: raźmieščany na Japonskim mory miehakurort «časova nie prymaje zamiežnych turystaŭ». Čamu — nie zrazumieła. Jak doŭha — taksama, piša Bild.
Pabyvać tam za minułyja dva tydni paśpieli tolki paŭnočnakarejcy i nievialikaja hrupa rasijan. Udałosia nanieści vizit i ministru zamiežnych spraŭ Rasii Siarhieju Łaŭrovu, jaki zajaviŭ: «Upeŭnieny, što rasijskija turysty buduć imknucca siudy ŭsio bolš i bolš».
Heta była prystojnaja łyžka dypłamatyčnaha miodu. Li Sanhhin ź Instytuta stratehičnych daśledavańniaŭ u Sieule miarkuje, adnak, što rasijskim haściam kurort Kima moža zdacca zanadta addalenym i darahim. Heta zdajecca praŭdzivym.
Vydańnie «Fontanka» davoli padrabiazna apisvaje niedachopy adpačynku ŭ KNDR:
Tur kaštuje ad 145 000 rasijskich rubloŭ (1850 dalaraŭ) na čałavieka za siem dzion (biez uliku koštu biletaŭ da Uładzivastoka)
Pry hetym častku hetaj sumy treba vypłacić u dalarach (1400 dalaraŭ), da taho ž «novymi» banknotami i tolki ŭ maskoŭskim ofisie turapieratara A kali chočacca chacia b asobny numar — heta abydziecca ŭ jašče 450 «novych» dalaraŭ; numar druhoha kłasa — 520 dalaraŭ z čałavieka, pieršaha kłasa — 850 dalaraŭ.
Z 7 dzion tolki čatyry adviedzieny na plažny adpačynak. U astatnija dni ŭ prahramie — vizit u stalicu da pomnika Čučche, u Muzej Pieramohi, da pomnika vyzvalicielam i inšych ideałahična značnych u KNDR abjektaŭ.
Ci zachoča chto zryvacca za svoj košt u takoje padarožža — pytańnie. Adnak ekśpierty ličać, što Kim usio ž adkryje svoj plaž dla zamiežnych haściej. Budoŭla kurortu, vierahodna, abyšłasia ŭ vialikija sumy, jakija treba akupić. Pakul ža, jak śćviardžaje dziaržaŭnaja prapahanda, kurort zapoŭnieny svaimi, paŭnočnakarejskimi turystami.
Kamientary