Mahčymy ŭvachod u padziemny chod na Zasłaŭskim zamku ŭ paniadziełak adkryŭsia archieołaham, paviedamiŭ telehram-kanał Instytuta historyi.
Navukoŭcy Instytuta historyi NAN Biełarusi sumiesna ź Minskim abłvykankamam, Zasłaŭskim harvykankamam i inšymi zacikaŭlenymi ŭžo kala miesiaca viaduć raskopki pad kiraŭnictvam Ivana Śpiryna.
Niahledziačy na častyja daždžy, praca pa raskryćci padziemnaha chodu ŭ staražytnym nasypu Zasłaŭla praciahvałasia.
Raniej paviedamlałasia što na terytoryi Zasłaŭskaha zamka pačalisia vialikija archieałahičnyja raskopki. Adna z zajaŭlenych metaŭ — vyvučyć zahadkavy padziemny chod, jaki byŭ znojdzieny jašče ŭ 1970-ch hadach, ale da hetaha času nie daśledavany.
Hety chod upieršyniu vyjaviŭ jašče ŭ savieckija časy archieołah Hieorhij Štychaŭ. Tady jaho častkova rasčyścili: šyrynia chodu składaje kala 80 santymietraŭ, vyšynia — kala 1 mietra 20 santymietraŭ. Adnak adna sa ścien była paškodžanaja, tamu dalejšyja daśledavańni prypynili.
Ciapier kamanda archieołahaŭ, vałancioraŭ i studentaŭ imkniecca vyśvietlić, jakoje było pryznačeńnie hetaha padziemnaha chodu. Jak patłumačyŭ Ivan Śpiryn, staršy navukovy supracoŭnik Instytuta historyi NAN Biełarusi, chod moža być jak padziemnym kalidoram, tak i drenažnaj sistemaj abo sakretnym łazam.
Daśledavańni prachodziać na zachodniaj častcy zamka — kala zamkavaj bramy XVI stahodździa, praź jakuju raniej u jaho ŭvachodzili kniaskija družyny i kupieckija karavany. Płanujecca zaviaršyć pracu da kanca lipienia, ale terminy mohuć zrušycca z-za nadvorja ci znachodak.
Kali ŭdasca dakładna vyznačyć pryznačeńnie padziemnaha chodu i ŭmovy dazvolać, hety abjekt moža stać adkrytym dla naviedvalnikaŭ.
Zasłaŭski zamak byŭ pabudavany ŭ XVI stahodździ. Ciapier na jaho miescy zachavalisia Spasa-Praabraženskaja carkva, ruiny zamkavaj bramy, vały i ravy.
Kamientary