Pucin vyrašyŭ nie lacieć u Braziliju na samit BRIKS z-za pahrozy aryštu
Prezident Rasii Uładzimir Pucin vyrašyŭ nie ŭdzielničać asabista ŭ samicie BRIKS, jaki adbudziecca ŭ Brazilii 6—7 lipienia. Heta źviazana z tym, što Brazilija, jak kraina, jakaja padpisała Rymski statut Mižnarodnaha kryminalnaha suda (MKS), maje abaviazak aryštavać jaho pavodle vydadzienaha ŭ Haazie ordara, paviedamiŭ pamočnik prezidenta Rasii Juryj Ušakoŭ.
Zamiest Pucina na samit pajedzie ministr zamiežnych spraŭ Siarhiej Łaŭroŭ, a sam rasijski lidar voźmie ŭdzieł u sustrečy ŭ farmacie videasuviazi.
«Prezident budzie ŭdzielničać pa videasuviazi ŭ asnoŭnych mierapryjemstvach hetaha samitu. Heta źviazana z peŭnymi składanaściami ŭ kantekście patrabavańniaŭ MKS, vy viedajecie, i mienavita ŭ hetym kantekście brazilski ŭrad nie moh zaniać vyraznuju pazicyju, jakaja dazvoliła b našamu prezidentu pryniać udzieł u hetym pasiadžeńni», — zajaviŭ Juryj Ušakoŭ.
Brazilski prezident Łuła da Siłva raniej užo admaŭlaŭsia harantavać Pucinu biaśpieku ŭ vypadku jahonaha pryjezdu na samit G20 u Rya-de-Žanejra. Jon zajaviŭ, što rašeńnie adnosna mahčymaha aryštu ŭ hetaj krainie prymaje sud, a nie ŭrad.
U 2023 hodzie Pucin užo admaŭlaŭsia ad pajezdak na mižnarodnyja samity — u PAR, Indyju i Turcyju — pa tych ža pryčynach. PAR užo papiaredziła, što nie zaprašaje Pucina na samit G20 u 2025 hodzie, bo pravavaja situacyja nie źmianiłasia i MKS zastajecca abaviazkovym dla krainy. U toj ža čas jon ryzyknuŭ źjeździć u Manholiju, jakaja taksama padpisała Rymski statut, i miascovyja ŭłady aryštavać jaho nie navažylisia.
«My znachodzimsia ŭ enierhietyčnaj zaležnaści». Manholija rastłumačyła, čamu nie aryštavała Pucina
Byłoha prezidenta Filipinaŭ aryštavali pa ordary Mižnarodnaha kryminalnaha suda
Armienija ratyfikavała Rymski statut Mižnarodnaha kryminalnaha suda, jaki vydaŭ ordar na aryšt Pucina
«My budziem ščaślivyja, kali jon nie pryjedzie». U PAR znoŭ paprasili Pucina nie lacieć na samit BRIKS
PAR ciapier kaža, što nie płanuje vychodzić z damovy ab Mižnarodnym kryminalnym sudzie dziela Pucina
Kamientary