Kiraŭnik Paleścinskaj aŭtanomii vystupiŭ za demilitaryzacyju CHAMAS
89-hadovy kiraŭnik Paleścinskaj aŭtanomii Machmud Abas zajaviŭ, što CHAMAS «pavinien skłaści zbroju», i zaklikaŭ da razhortvańnia mižnarodnych sił dla abarony paleścinskaha naroda, piša Euronews.
U liście, adrasavanym prezidentu Francyi Emanuelu Makronu i naślednamu pryncu Saudaŭskaj Aravii Muchamiedu bin Sałmanu, Machmud Abas vykłaŭ asnoŭnyja kroki, jakija, na jaho dumku, nieabchodna raspačać dla spynieńnia vajny ŭ Hazie i dasiahnieńnia miru na Blizkim Uschodzie.
«CHAMAS bolš nie budzie kiravać Hazaj i pavinien pieradać svaju zbroju i vajskovy patencyjał paleścinskim siłam biaśpieki», — napisaŭ Abas.
Jon skazaŭ, što «hatovy zaprasić arabskija i mižnarodnyja siły dla razhortvańnia ŭ ramkach misii pa stabilizacyi/abaronie z mandatam Rady Biaśpieki (AAN)».
«My hatovyja zaklučyć u vyraznyja i abaviazkovyja terminy i pry mižnarodnaj padtrymcy, nahladzie i harantyjach mirnaje pahadnieńnie, jakoje pakładzie kaniec izrailskaj akupacyi i vyrašyć usie niavyrašanyja pytańni statusu», — zajaviŭ Abas, adznačyŭšy, što «CHAMAS pavinien nieadkładna vyzvalić usich zakładnikaŭ i pałonnych».
Emanuel Makron i Muchamied bin Sałman buduć sustaršyniami kanfierencyi ŭ Ńju-Jorku pa ŭrehulavańni paleścina-izrailskaha kanfliktu na asnovie pryncypu «dźvie dziaržavy dla dvuch narodaŭ». Kanfierencyja startuje 17 červienia.
U svajoj zajavie Jelisiejski pałac vitaŭ kankretnyja i biesprecedentnyja abaviazacielstvy, jakija demanstrujuć realnuju hatoŭnaść ruchacca da realizacyi rašeńnia ab dźviuch dziaržavach. Makron zajaviŭ, što jon poŭny rašučaści «pryznać paleścinskuju dziaržavu», ale taksama vystaviŭ niekalki ŭmoŭ, uklučajučy demilitaryzacyju CHAMAS.
U svaim liście Abas paćvierdziŭ svaju prychilnaść refarmavańniu Paleścinskaj administracyi i paćvierdziŭ svoj namier pravieści prezidenckija i ŭsieahulnyja vybary na praciahu hoda pad mižnarodnaj ehidaj. Paleścinskaja administracyja ciapier znachodzicca pad ciskam arabskich i zachodnich dziaržaŭ, jakija patrabujuć praviadzieńnia značnych reformaŭ.
Izrail pierachapiŭ sudna z Hretaj Tunbierh, jakoje išło ŭ Hazu
Bajeviki CHAMAS rasstralali piać paleścincaŭ, jakija sprabavali ŭziać ježu sa składu AAN
U Izraili paviedamili pra zabojstva novaha lidara CHAMASa ŭ Hazie
«Nie na tym baku čałaviečnaści». Nietańjachu abvinavaciŭ lidaraŭ Brytanii, Francyi i Kanady ŭ zaachvočvańni CHAMAS
Kamientary
Na..vošta ?? Kab zarvać damoŭlennaści pamiž Fatch i TelAvivam ab stvareńni adzinaj dziaržavy Palaścina