Usio, akramia Danbasa i jašče pary punktaŭ. Pra što damovilisia Donald Tramp i Uładzimir Zialenski ŭ Fłarydzie

Cudoŭnaja razmova amal pra ŭsio

Pierad sustrečaj z Donaldam Trampam Uładzimir Zialenski kazaŭ, što heta budzie «adzin z samych aktyŭnych dypłamatyčnych dzion hoda», pry hetym «mnohaje» moža vyrašycca jašče ŭ 2025-m.

Pieramovy amierykanskaj i ŭkrainskaj delehacyj u pryvatnaj rezidencyi Donalda Trampa Mar-a-Łaha ŭ Fłarydzie praciahvalisia kala troch hadzin. Pa ich vynikach Tramp adrazu zajaviŭ, što jany byli «vydatnymi» i što heta była «cudoŭnaja razmova», jakaja značna nabliziła zakančeńnie rasijska-ŭkrainskaj vajny.

Pavodle jaho słoŭ, mirnaje pahadnieńnie blizka, baki ŭzhadnili kala 95% umoŭ. Zrešty, sam ža jon i dadaŭ, što nie vyrašanym zastałosia klučavoje pytańnie — kamu buduć naležać rehijony Danbasa.

Hetaje pytańnie Donald Tramp nazvaŭ «najvažniejšym», i tut baki, pa jaho mierkavańni, pakul jašče «nabližajucca da pahadnieńnia».

Uładzimir Zialenski pa vynikach pieramovaŭ daŭ zrazumieć, što pytańnie Danbasa ŭsio jašče maksimalna aktualnaje, i pazicyja Ukrainy z hetaj nahody «jasnaja i adroźnivajecca ad rasijskaj».

Dla Ukrainy, zajaviŭ paśla pieramovaŭ Zialenski, «klučavym etapam na šlachu da dasiahnieńnia tryvałaha miru» źjaŭlajucca harantyi biaśpieki dla krainy, a nie terytaryjalnaje pytańnie.

Jon udakładniŭ, što ŭkrainskaja kamanda praciahnie pracavać nad hetym punktam pahadnieńnia ź jeŭrapiejskimi palitykami, ale tam, pavodle jaho słoŭ, treba «zaviaršyć usie pytańni, jakija abmiarkoŭvalisia», a adbycca heta moža ŭ najbližejšyja tydni.

Tramp i paśla pieramovaŭ nastojvaŭ, adkazvajučy na pytańni ŚMI, što zaklučyć ździełku pa terytoryjach lepš jak maha chutčej. Jon skazaŭ, što Ukraina prajaviła «vialikuju advahu <…> i naniesła vielizarnuju škodu [praciŭniku]», ale kanfliktu «para pakłaści kaniec»

Prezident ZŠA navat skazaŭ pra hatoŭnaść vystupić pierad parłamientam Ukrainy, tłumačačy nieabchodnaść mirnaha pahadnieńnia. Uładzimir Zialenski na heta dypłamatyčna adkazaŭ: «Vam zaŭsiody rady».

Danbas — i «nie marudziačy»

Rasija ličyć pytańnie prynaležnaści rehijonaŭ Danbasa hałoŭnym dla siabie. Uładzimir Pucin vykazaŭ svaju pazicyju ŭ telefonnaj razmovie z Donaldam Trampam, jakaja adbyłasia ŭ toj ža dzień niezadoŭha da sustrečy ź Zialenskim.

Pucin zaklikaŭ Trampa aryjentavacca na «razumieńni», dasiahnutyja pamiž imi ŭ Ankorydžy — choć pra važnyja damoŭlenaści tady nie paviedamlałasia. A jaho pamočnik Juryj Ušakoŭ ahučyŭ hałoŭnaje patrabavańnie rasijskaha boku: Kijeŭ pavinien pryniać «śmiełaje, adkaznaje palityčnaje rašeńnie <…>, jakoje tyčycca Danbasa».

«Hetaje rašeńnie, jakoje tyčycca Danbasa, z ulikam situacyi, jakaja składvajecca na frantach, ukrainskamu režymu mieła b sens pryniać nie marudziačy», — zajaviŭ Ušakoŭ.

Pavodle słoŭ Ušakova, Pucin i Tramp płanujuć stelefanavacca jašče raz — užo pa vynikach pieramovaŭ u Fłarydzie.

I Donald Tramp, i Uładzimir Zialenski kažuć usiaho pra tydni, pa zakančeńni jakich možna čakać rašeńniaŭ, jakija spyniać vajnu.

Ale heta znoŭ nie tyčycca Danbasa — Uładzimir Zialenski nastojvaje na svaim, kažučy, što hetaje pytańnie pavinna być vyrašana narodam Ukrainy abo jaho vybranymi pradstaŭnikami.

Heta patencyjna stavić baki ŭ tupik — Ukraina patrabuje spynieńnia ahniu na čas padrychtoŭki i praviadzieńnia hałasavańnia, Rasija admaŭlaje joj u hetym, a Pucin užo niekalki razoŭ paŭtaraŭ, što atrymańnia hetych terytoryj jon moža damahčysia i vajennym šlacham.

Ukrainski prezident dadaŭ, što luby z punktaŭ mirnaha pahadnieńnia, jakoje abmiarkoŭvajecca ciapier, moža być vyniesieny jak na refierendum, tak i na razhlad parłamientam krainy.

Tramp nie vyklučyŭ, što niepradbačanyja prablemy jašče mohuć uźniknuć. Pavodle jaho słoŭ, luby punkt ź mirnaha płana «mahčyma, akažacca vielmi važnym» i sapsuje ŭsiu damovu całkam.

Adkazvajučy na pytańnie, jak chutka moža skončycca vajna, Tramp znoŭ skazaŭ pra jasnaść, jakaja pavinna nastupić na praciahu niekalkich tydniaŭ. Pavodle jaho słoŭ, u najbližejšaj budučyni całkam vierahodnaja ŭžo trochbakovaja sustreča pamiž ZŠA, Ukrainaj i Rasijaj: «Pucin choča, kab heta adbyłosia. Jon mnie vielmi vyrazna skazaŭ, ja jamu vieru».

Jak reahujuć inšyja baki na sustreču Zialenskaha i Trampa

• Staršynia Jeŭrakamisii Ursuła fon der Lajen paśla videakanfierencyi z Donaldam Trampam i Uładzimiram Zialenskim napisała ŭ sacsietcy X: «Jeŭropa hatova praciahvać pracu z Ukrainaj i našymi amierykanskimi partniorami, kab zamacavać prahres [dasiahnuty na pieramovach]. Hałoŭnaje ŭ hetych namahańniach — heta kab ź pieršaha dnia byli žaleznyja harantyi biaśpieki».
• Pres-sakratar premjer-ministra Vialikabrytanii Kira Starmiera, jaki taksama prymaŭ udzieł u videakanfierencyi, zajaviŭ, što i Starmier, i jeŭrapiejskija lidary «padkreślili važnaść ćviordych harantyj biaśpieki i znoŭ zajavili pra nieadkładnaść spynieńnia hetaj varvarskaj vajny jak maha chutčej». «Premjer-ministr padkreśliŭ prychilnaść Złučanaha Karaleŭstva ciesnaj pracy z partniorami, z tym kab zachavać nabrany temp u najbližejšyja dni», — dadaŭ pradstaŭnik Daŭninh-stryt.
• Z rasijskaha boku reakcyja pakul abmiežavałasia pastom u X śpiecpradstaŭnika prezidenta Kiryła Dźmitryjeva, jaki padziakavaŭ prezidentu Trampu. «Uvieś śviet šanuje mirnyja namahańni prezidenta Trampa i jaho kamandy», — napisaŭ Dźmitryjeŭ pa-anhlijsku.

• 0
• 0
• 0
• 0
• 0
• 0
• 0
• 0