Pieršaha sakratara pasolstva Biełarusi ŭ ZŠA pasadzili za palityku
Dźmitryj Iljuchin — uradženiec Navapołacka, jaki budavaŭ paśpiachovuju dypłamatyčnuju karjeru. U 2020‑m jon uvachodziŭ u vybarčuju kamisiju ŭ Kanadzie, i na jahonym učastku Cichanoŭskaja razhramiła Łukašenku. Paśla zvalnieńnia ź dziaržaŭnaj słužby Iljuchin pracavaŭ u pradstaŭnictvie Mižnarodnaha čyrvonaha kryža.
Dźmitryju Iljuchinu 35 hadoŭ. Jon rodam z Navapołacka, dzie ŭ 2007‑m skončyŭ škołu z hramadska-ekanamičnym uchiłam.
Vyšejšuju adukacyju atrymlivaŭ u adnych z najlepšych VNU rehijona: spačatku vučyŭsia na jurydyčnym fakultecie BDU, paśla pieravioŭsia ŭ prestyžny Maskoŭski dziaržaŭny instytut mižnarodnych adnosin (MDIMA), jaki skončyŭ u 2012 hodzie. U jahonym aktyvie taksama stažyroŭka ŭ Svabodnym univiersitecie Bierlina i mahistarskaja stupień na Fakultecie mižnarodnych adnosinaŭ BDU.
Karjeru ŭ Ministerstvie zamiežnych spraŭ Dźmitryj pačaŭ u 2012 hodzie. Jon pracavaŭ ataše ŭ konsulskim upraŭleńni, paśla amal try hady pravioŭ u pasolstvie Biełarusi ŭ Jehipcie na pasadzie treciaha sakratara. Kali viarnuŭšysia ŭ Minsk, staŭ pieršym sakratarom va ŭpraŭleńni Jeŭropy i Paŭnočnaj Amieryki. A ŭ 2019 hodzie Iljuchin adpraviŭsia ŭ Kanadu na pasadu pieršaha sakratara.
U Atavie jon byŭ členam vybarčaj kamisii na prezidenckich vybarach 2020 hoda. Zhodna z aficyjnym pratakołam, na jahonym učastku razhromna pieramahła Śviatłana Cichanoŭskaja, jakaja nabrała 321 hołas (91%) suprać 21 hołasa (6%) u Łukašenki.
U žniŭni 2021 hoda Iljuchin pabyŭ konsułam u Ńju-Jorku, a zatym — pieršym sakratarom pasolstva Biełarusi ŭ Vašynhtonie. U krasaviku 2022 hoda Dźmitryj pakinuŭ dypłamatyčnuju słužbu.
Paśla zvalnieńnia ź dziaržaŭnaj słužby Dźmitryj pracavaŭ u pradstaŭnictvie Mižnarodnaj fiederacyi tavarystvaŭ Čyrvonaha Kryža (IFRC) u Minsku, dzie ŭ vieraśni 2024 hoda atrymaŭ pavyšeńnie da staršaha aficera pa raźvićci nacyjanalnaha tavarystva.
Na hetaj pasadzie jon faktyčna byŭ pradstaŭnikom Ženievy, adkaznym za refarmavańnie i prafiesijanalizacyju Biełaruskaha tavarystva Čyrvonaha kryža. Jahonaja praca prypała na kryzisny pieryjad, kali IFRC prypyniła členstva BTČK praz skandały vakoł kiraŭnika arhanizacyi Dźmitryja Šaŭcova. Imavierna, zadačaj Iljuchina było viarnuć biełaruskuju strukturu ŭ rečyšča mižnarodnych standartaŭ niejtralnaści i niezaležnaści.
Nieviadoma, kali Iljuchina zatrymali, ale adbyłosia heta kala hodu tamu. Dźmitryja sudzili ŭ Minskim haradskim sudzie za «sadziejničańnie ekstremisckaj dziejnaści» (č. 1 i 2 art. 361‑4 KK). Prysud ustupiŭ u siłu śniežni 2025 hoda.
Ciapier mužčyna adbyvaje pakarańnie ŭ kałonii ci na «chimii» z nakiravańniem — u sacsietkach jon nie źjaŭlaŭsia kala hodu, a jahony akaŭnt u telehramie vydaliŭsia. Doma jaho čakajuć žonka i maleńkaje dzicia.
«Naša Niva» — bastyjon biełaruščyny
PADTRYMAĆ
«Lena 20 rubloŭ» uziałasia za staroje: znakamitaja machlarka znoŭ razvodzić davierlivych biełarusaŭ3
Kamientary
Pomściać, čerci, ludziam ...