Ciapier jana pamočnica Alaksandra Łukašenki pa Mahiloŭskaj vobłaści.
65‑hadovaja Nadzieja Katkaviec pryznačana pamočnikam Łukašenki — inśpiektaram pa Mahiloŭskaj vobłaści. Čynoŭnica najbolš zapomniłasia svaimi razvahami pra «chaacičaski słožanyja ceny».
«Nadzieja Mikałajeŭna, ja vas viedaju daŭno. Vy čałaviek aktyŭny. Napeŭna, bolš vopytnaha za stałom nikoha niama. Usio budzie zaležać ad taho, nakolki vy i dalej budziecie takim aktyŭnym čałaviekam. Jak vy bačycie, zasiedziecca na miescy niedzie tam ja vam nie daŭ, — skazaŭ Łukašenka joj. — Adpačyli troški i napierad».
Katkaviec apošnim časam była na piensii, ale zajmałasia navukovaj dziejnaściu.
Jana pačynała svaju pracoŭnuju dziejnaść u Škłoŭskim rajonie, u saŭhasie «Haradziec», dzie pracavaŭ i Łukašenka. Paźniej była čynoŭnicaj, darasła ŭ 2013‑m da namieśnicy kiraŭnika spraŭ Łukašenki (na hetaj pasadzie była da 2017-ha). Paśla Katkaviec stała staršynioj naziralnaj rady Parytetbanka, a z kanca 2017-ha pracavała ŭ Biełaruskaj nacyjanalnaj bijatechnałahičnaj karparacyi. Apošnija hady (2022-2023) pracavała ŭ rehijanalnych filijałach BNBK.
Akramia taho, pamočnikam — inśpiektaram pa Homielskaj vobłaści pryznačany Juryj Valavaty. Dahetul jon pracavaŭ pieršym namieśnikam staršyni Hrodzienskaha abłvykankama.
Dźmitryj Reucki staŭ pamočnikam Łukašenki i inśpiektaram pa Minsku. Raniej jon byŭ namieśnikam staršyni KDB.
Taksama Łukašenka źmianiŭ kiraŭnikoŭ u Škłoŭskim i Babrujskim rajonach. Novym staršynioj Škłoŭskaha rajvykankama staŭ Michaił Krycki. Siudy jon piarojdzie z pasady kiraŭnika Babrujskaha rajvykankama, na čale jakoha ciapier budzie pracavać Alaksandr Kaŭranin. Jon da hetaha času byŭ pieršym namieśnikam staršyni — načalnikam upraŭleńnia pa sielskaj haspadarcy i charčavańni Babrujskaha rajvykankama.
Kamientary
[Zredahavana]