Na placoŭcy «BUTB-Majomaść» u studzieni adbudziecca aŭkcyjon pa prodažy siadziby va Ušackim rajonie. Budynak płoščaj 705 kvadratnych mietraŭ, raźmieščany pobač z aziorami, acanili ŭsiaho ŭ 42 rubli, piša Realt.by.
Siadziba «Małyja Dolcy» znachodzicca ŭ vioscy Novaje Žyćcio. Status historyka-kulturnaj kaštoŭnaści jana atrymała tolki ŭ 2020 hodzie. Da 2013 hoda tut raźmiaščałasia kantora miascovaha sielskahaspadarčaha pradpryjemstva.
Adnak kali zazirnuć hłybiej u historyju, možna daviedacca, što siadzibny dom byŭ pabudavany ŭ 1848 hodzie, a da pačatku XX stahodździa siadziba naležała rodu Suščynskich. U 1909 hodzie tut była stvorana i pastaŭlena adna ź pieršych biełaruskich pjes — «Michałka».
Zaraz budynak płoščaj 705 kvadratnych mietraŭ zakansiervavany. Heta kapitalnaje muravanaje zbudavańnie z padvałam, miezaninam i prybudovaj. Akonnyja prajomy začynieny (zakładzieny błokami), dach nakryty šyfieram. Hetyja miery dazvolili abaranić centr majontka ad vandalizmu i dalejšych razbureńniaŭ. Pobač zachavalisia frahmienty staradaŭniaha parku.
Siadziba raźmieščana ŭ cikavym miescy — niepadalok praciakaje raka Ušača, pobač znachodziacca try voziery i les. Da siadziby adnosicca ziamielny ŭčastak płoščaj 11,48 sotki, jaki pradastaŭlajecca ŭ arendu terminam na 50 hadoŭ.
Novy ŭładalnik zmoža vykarystoŭvać ziamielny ŭčastak dla viadzieńnia pradprymalnickaj dziejnaści i raźmiaščeńnia abjektaŭ vytvorča-dziełavoha pryznačeńnia, sielskahaspadarčych abjektaŭ, a taksama dla budaŭnictva i absłuhoŭvańnia adnakvaternaha žyłoha doma.
Aŭkcyjon adbudziecca na placoŭcy «BUTB-Majomaść» 23 studzienia 2026 hoda. Pačatkovy košt — 42 rubli.
Cikava, što jašče niekalki hadoŭ tamu rynkavaja vartaść doma składała 115 tysiač rubloŭ.
-
Biełaruska aburyłasia koštam arendy kvatery ŭ Baranavičach i paskardziłasia ŭ Pałatu pradstaŭnikoŭ
-
Damy «Minsk-Śviet» znoŭ zaliło: vada strumieniami padała sa stoli, vybiła lampy
-
Ajcišnik i były palitviazień Viktar Kuŭšynaŭ pradaje za 850 tysiač jeŭra dom u Partuhalii, jaki pabudavaŭ paŭtara hoda tamu FOTY
Kamientary
[Zredahavana]