Minčanka pastaviła doma kamiery, kab nazirać za stareńkaj maci, i raskryła złačynstva
21-hadovy zamiežny hramadzianin z bratam pryjechali ŭ Minsk padzarabić. Jany arandavali aŭtamabil, pahruzili ŭ bahažnik nabyty na rynku ŭ Ždanovičach posud i nakiravalisia pradavać jaho ŭtraja daražej, paviedamlajuć Minsk-naviny.
Prajazdžajučy pa vuł. Brykieta, maładyja ludzi ŭbačyli dźviuch pažyłych žančyn. Fihurant pačaŭ uhavorvać babul kupić u jaho za 100 rubloŭ patelniu, a paśla prajšoŭ z adnoj z žančyn u jaje kvateru.
U kvatery dačkoj piensijanierki byli ŭstalavanyja kamiery videanazirańnia, bo 89-hadovaja minčanka maje prablemy sa zdaroŭjem, u tym liku pakutuje na demiencyju. Znachodziačysia na pracy, žančyna vyrašyła pahladzieć, čym zajmajecca jaje maci, i ŭbačyła ŭ ich kvatery nieznajomaha, jaki zaziraŭ u šafy i tumby. Pra heta jana nieadkładna paviedamiła ŭ milicyju.
Supracoŭniki milicyi zatrymali zamiežnika, jaki skraŭ u kvatery juvielirnyja ŭpryhožańni na 9 300 rubloŭ. Paśla ŭ dačynieńni da jaho zaviali kryminalnuju spravu. Vinu hramadzianin nie pryznaŭ. Škoda była kampiensavana šlacham kanfiskacyi skradzienaha i jaho viartańnia zakonnamu ŭładalniku.
— Abvinavačvany raniej da kryminalnaj adkaznaści nie pryciahvaŭsia, — prakamientavała pamočnik prakurora Frunzienskaha rajona Alaksandra Leŭta, jakaja vystupała pa kryminalnaj spravie dziaržaŭnym abvinavaŭcam. — Sud pryznaŭ jaho vinavatym u zamachu na tajnaje vykradańnie majomaści (kradziež) i na padstavie č. 1 art. 14, č. 1 art. 205 KK pryznačyŭ pakarańnie dva hady pazbaŭleńnia voli, jakija abvinavačvany praviadzie ŭ vypraŭlenčaj kałonii va ŭmovach ahulnaha režymu. Na padstavie Zakona ab amnistyi sud častkova vyzvaliŭ jaho ad pryznačanaha pakarańnia terminam na 1 hod.
Ciapier čytajuć
Vyzvalenym i departavanym va Ukrainu palitviaźniam nie addali pašparty7
Kamientary