Biełarusaŭ, jakija nanieśli svaje biznesy na kartu «Novaj Biełarusi» i viarnulisia ŭ krainu, prymušajuć kajacca i klaści Libiera

U pieršym videa dziaŭčyna nazyvaje svaje poŭnyja ankietnyja źviestki i kaža, što žyvie ŭ Homieli. Jana raskazvaje, što ŭ 2022 hodzie pajechała žyć u Hruziju i «pakinuła svaje kantaktnyja źviestki ŭ ekstremisckaj płatformie «Novaja Biełaruś».

Havorka idzie pra servis SVAE (raniej — «Novaja Biełaruś»), na jakim biełarusy-emihranty, jakija zajmajucca biznesam ci akazvajuć pasłuhi, mahli pakinuć źviestki pra siabie — kab karystalniki płatformy z dyjaspary mahli ich znajści.

Z Hruzii dziaŭčyna viarnułasia ŭ Biełaruś. Tut, vyhladaje, da jaje pryjšli siłaviki.

U kancy videa dziaŭčyna zaklikaje «nie daviarać źbiehłym palitemihrantam, jakija harantujuć kanfidencyjnaść vašaj infarmacyi».

U druhim videa inšaja dziaŭčyna kaža, što kali žyła i vučyłasia ŭ Tbilisi, to «zarehistravała svaje pasłuhi na karcie prahramy «Novaja Biełaruś». Jana dumała, što «tak možna i što jaje źviestki abaronienyja».

U vyniku jana viarnułasia ŭ Biełaruś. A ciapier da jaje maci pryjšli ź pieratrusam. U apublikavanaj historyi ŭ instahramie dziaŭčyna kaža, što «publikacyja ŭzhodnienaja z pravaachoŭnikami Biełarusi». Dadaje, što «spadziajecca, što ŭsie skončycca dobra».

Pavialičyć

Dziaŭčyna kaža, što, maŭlaŭ, stvaralniki prahramy nie pakłapacilisia pra abaronu źviestak i zaklikaje nie karystacca prahramami, jakija stvaraje Pavieł Libier, bo «tak vy stanoviciesia čalcom ekstremisckaha farmiravańnia».

Jak pracuje hetaja karta?

Usio prosta — vy pieradajacie nazvu svajho biznesu i kantaktnyja źviestki administrataram prahramy SVAE (raniej — «Novaja Biełaruś»). Jany nanosiać ich na kartu i robiać dastupnymi ŭsim achvotnym.

Na momant stvareńnia servisu jon byŭ całkam lehalnym, adnak ź ciaham času siłaviki abvieścili jaho «ekstremisckim farmavańniem».

Havorka idzie nie pra źliŭ infarmacyi z samoj prahramy, a pra toje, što siłaviki zahadzia zachavali ahulnadastupnyja źviestki abiedźviuch dziaŭčyn i paśla pryjšli da ich ź pieratrusami. Heta zroblena dla taho, kab paćvierdzić «źliŭ» z płatformy «Novaja Biełaruś», jakoha, chutčej za ŭsio, nie było.

Biezumoŭna, biełarusam, asabliva tym, chto viartajecca ŭ Biełaruś, varta być aściarožnymi z raźmiaščeńniem svaich źviestak u praduktach, jakija patencyjna mohuć pryznać «ekstremisckimi», i ŭličvać ryzyku ŭzajemadziejańnia ź lubymi padobnymi servisami. Pa represiŭnaj łohicy łukašenkaŭcaŭ, nie maje značeńnia, što ludzi dadavali infarmacyju pra svoj biznes na kartu ŭ «biaśpiečny» čas.

Mahčyma, zapis padobnych videa — umova dla vyzvaleńnia ad adkaznaści albo dla minimizacyi nastupstvaŭ. 

U minułym hodzie siłaviki admovilisia ad praktyki vystaŭleńnia ŭ svaich kanałach videa z zatrymanymi biełarusami. Ciapier ža, vyhladaje, jany nastojvajuć, kab ludzi publikavali roliki padobnaha źmiestu ŭ svaich akaŭntach.

• 2
• 0
• 3
• 13
• 0
• 4
• 16
• 0