17-hadovy startapier Burbicki namiakaje, što Libier prabraŭsia da jaho ŭ kvateru i raskidaŭ rečy
Historyja z 17-hadovym startapieram z Baranavič Alaksiejem Burbickim, jaki abvinavaciŭ Paŭła Libiera ŭ zamoŭčvańni fakta ŭzłomu płatformy «Novaja Biełaruś», nabyła novy pavarot. Paśla publikacyj pra siabie ŭ ŚMI Alaksiej Burbicki, pa jaho słovach, sutyknuŭsia z pahrozami, błakiroŭkaj instahrama i navat pahromam kvatery.
«Dziakuj za błakiroŭku majho asnoŭnaha akaŭnta, Pavieł Libier. Kali vy budziecie praciahvać rabić toje, što vy robicie, nastupstvy dla vas buduć jašče horšyja», — pahražaje chłopiec, supravadžajučy videa kadrami ź nibyta svajho razhromlenaha žytła.
Na videa možna pabačyć nieachajna rasstaŭleny abutak, kresły i karobku, što valajucca na padłozie, niekalki adkrytych šufladak i šafu ź biesparadkam unutry. Na pieršy pohlad moža padacca, što ŭ kvatery prosta daŭno nie było hienieralnaj pryborki. Ale Burbicki nastojvaje: «Heta prosta pierachodzić usie miežy. Palicyja raźbiarecca».
Varta adznačyć, što ŭžo praz 15 chvilin paśla publikacyi jaho videa nabrała niekalki sotniaŭ łajkaŭ, pry tym što dahetul maje mienš za 50 prahladaŭ.
Taksama Burbicki skardzicca, što paśla publikacyj u ŚMI sutyknuŭsia z chiejtam i pahrozami, jakija ananimnyja aŭtary dasyłajuć jamu ŭ telehramie i instahramie. Niekalki ź ich jon pierasłaŭ žurnalistu «Našaj Nivy». Usie jany nosiać niecenzurny charaktar, a hałoŭny ich pasył u tym, što Alaksieju na paru z błohieram Siarhiejem Piatruchinym budzie vielmi drenna, kali jon nie spynić publikavać videa z krytykaj Paŭła Libiera.
Chłopiec kaža, što źbirajecca źviartacca ŭ palicyju, pry hetym nibyta atrymanyja ananimnyja pahrozy ŭžo vydaliŭ. Na prośbu žurnalista «Našaj Nivy» pakazać skrynšoty z paviedamleńniami-pahrozami Burbicki źliŭsia: «Ja vydaliŭ. Nie chaču ŭsio heta zachoŭvać».
Nahadajem, 19 maja na kanale błohiera Siarhieja Piatruchina vyjšła videa, u jakim jon daŭ słova 17-hadovamu Alaksieju Burbickamu z Baranavič — hieroju, jaki «adkryta pahadziŭsia raspavieści ab prablemie, nie chavajučy tvaru». U roliku jon začytaŭ abvinavačvańni na adras Paŭła Libiera i kamandy ŭ tym, što jany admysłova ŭtaili fakt uzłomu płatformy «Novaja Biełaruś» i źlivu asabistych danych karystalnikaŭ. Pry hetym u jakaści prufaŭ uciečki byli dałučanyja skrynšoty, na jakich možna pabačyć adkrytyja danyja pra polskija biznesy.
Burbicki taksama śćviardžaŭ, što z 2024 hoda pracavaŭ na Libiera jak prahramist, jale heta akazałasia chłuśnioj.
«Alaksiej u nas nikoli nie pracavaŭ», — prakamientavaŭ Pavieł Libier «Našaj Nivie». Alaksiej Burbicki na zapyt redakcyi admoviŭsia padavać inšyja paćvierdžańni pracy na «Novuju Biełaruś», akramia tych, što jon prademanstravaŭ na jutub-kanale Piatruchina:
«Usio, što ŭ mianie było, ja ŭsio raskazaŭ Siarhieju Piatruchinu, jakomu daviaraju. Bolš mnie dadać niama čaho. Usie dokazy ja jamu taksama daŭ».
Varta dadać, što šumicha pra ŭzłom «Novaj Biełarusi» padymajecca nie pieršy raz: raniej hetuju infarmacyju raspaŭsiudžvali kanały, źviazanyja ź biełaruskaj milicyjaj, a taksama błohier-kanśpirołah Vital Kandracienka (Virus). Jak tady, tak i ciapier, kamanda «Novaj Biełarusi» abvierhła hety fakt.
Što za 17-hadovy startapier, jaki vyliŭ cebar chłuśni na Libiera na radaść biełaruskim śpiecsłužbam
17-hadovy startapier zajaviŭ, što bazu karystalnikaŭ «Novaj Biełarusi» ŭzłamali. Libier adkazvaje: abvinavačvańnie absurdnaje
Piatruchin nie zdajecca: choča, kab KR zasłuchała 17-hadovaha «startapiera». Ale bieź jaho baćkoŭ hetaha rabić nielha
Ciapier čytajuć
Finalistak konkursu «Mis Biełaruś — 2025» vyvieli na scenu ŭ kaściumach z cytatami Łukašenki11
Kamientary