«Samaha milenijalnaha vykanaŭcu vybrali na vypuskny da zumieraŭ». Hrodzienskija vypuskniki nie acanili chedłajnieraŭ śviata
U jakaści chedłajnieraŭ na haradski vypuskny ŭ Hrodnie ŭ hetym hodzie ŭłady vyrašyli zaprasić rasijskich vykanaŭcaŭ Galibri&Mavik. Hrodzienskija vypuskniki ŭ sacsietkach aburylisia takim vybaram, piša Hrodna.life.
«Ubačyła chedłajniera na vypuskny ŭ Hrodnie i ŭžo niejak nie chočacca tudy iści», — vykazałasia adna z hrodzienskich vypusknic u tyktoku. U kamientarach jaje padtrymali:
- «Samaha milenijalnaha vykanaŭcu vybrali na vypuskny da zumieraŭ»;
- «Heta prosta treš, u adnym hrodzienskim kanale navat kamienty zakryli, tamu što akramia abureńniaŭ ničoha nie pisali»;
- «U tym hodzie było lepš…»;
- «Heta prosta kapiec, a ŭsie navinavyja pabliki Hrodna kryčać ab tym, maŭlaŭ, dzieci SAMI prasili hetych vykanaŭcaŭ u ankietavańni. Adna chłuśnia…»;
- «Ja navat nazvy ich hurta nie viedała i dumała, što hetyja pieśni heta niejki rofł…»
Adzin z karystalnikaŭ usio ž upeŭnieny, što mierkavańnie dziaciej nie varta ŭličvać:
«Dziciatka, nichto tabie nie abaviazany ŭvohule jakich-niebudź vykanaŭcaŭ na vypuskny zaprašać, dziakavała b kiraŭnictvu horada ŭvohule za takija inicyjatyvy klikać kahości, a tut jašče vybiraje, što joj nie padabajecca».
Galibri & Mavik — rasijski muzyčny duet u styli sučasnaj pop-muzyki. Stvorany ŭ 2020 hodzie Jaŭhienam Truchinym (Galibri) i Alaksandram Famienkavym (Mavik). Da hetaha jany pisali pieśni dla inšych artystaŭ, u tym liku — Kłava Koka, NILETTO i Chabiba. Viadomaść atrymali paśla chita «Fiedieriko Fiellini» (2021), jaki staŭ virusnym u tyktoku. Siarod inšych papularnych piesień — «Čak Norris», «Karnavał», «Diskotancy», «Romaški».
«Galibri&Mavik — adny z tych vykanaŭcaŭ, jakich prasili vučni vypusknych kłasaŭ, i za jakich hałasavała moładź u ankietach», — pisali ŭ aficyjnym kanale harvykankama, kamientujučy vybar.
Nie acanili vybar uładaŭ i bolšaść kamientataraŭ u instahramie kanale «Hrodna Plus»:
- «Ja, kaniešnie, usio razumieju, ale jak hetyja vykanaŭcy padychodziać pad tematyku vypusknoha i chto ich vybiraŭ? U minułym hodzie chacia b chedłajniery byli viadomyja vypusknikam i jany viedali nie adnu pieśniu artysta, u ich choć byli pieśni ŭ tematycy vypusknoha… Ciapier ža adzinaja pieśnia znajomaja ŭsim — Fiederyka Fielini, što ŭsie astatnija 4 hadziny my budziem rabić?»;
- «Možna nie prychodzić»;
- «Mda, horš być nie moža»;
- «Chto z vypusknikoŭ ich pisaŭ…»
Upieršyniu haradski vypuskny ŭ Hrodnie arhanizavali ŭ 2024 hodzie. U im pryniali ŭdzieł kala 2,5 tysiač vypusknikoŭ. Dla ich zładzili śviata z uračystym šeściem i kancertam na Savieckaj płoščy. Dla vypusknikoŭ vystupali, jak i ŭ hetym hodzie, vykanaŭcy z Rasii: 22-hadovy repier Fohiel i hurt Dabro.
U hetym hodzie čakajuć 2647 vypusknikoŭ siarednich škoł Hrodna. Mierapryjemstva projdzie 13 červienia na Savieckaj płoščy.
Kamientary