U minułym hodzie ŭ Biełarusi byli ŭspyški adru i koklušu. Ich maštab staŭ viadomy z unutranaha dakładu Ministerstva achovy zdaroŭja, jaki trapiŭ u rasparadžeńnie «Lusterka» z dapamohaj arhanizacyi «Biełpoł». Zhodna ź niepubličnymi danymi, kolkaść zachvarełych na hetyja infiekcyi vyrasła ŭ razy i akazałasia «rekordnaj» za apošnija 15 hadoŭ. Kolkaść vypadkaŭ adru vyrasła bolš čym u čatyry razy.
U 2024 hodzie ŭ Biełarusi zarehistravali 745 vypadkaŭ adru, vynikaje z zakrytaha dakładu Minzdaroŭja. Heta ŭ 4,6 raza bolš, čym u 2023 hodzie, kali pa ŭsioj krainie zarehistravali 160 vypadkaŭ zachvorvańnia.
U papiarednija hady adzior u Biełarusi byŭ vielmi redkaj źjavaj. Naprykład, u 2022, 2021, 2020, 2017 i 2015 hadach pa ŭsioj krainie rehistravałasia mienš za piać vypadkaŭ zachvorvańnia, u niekatoryja hady pakazčyk byŭ roŭny nulu. Miarkujučy pa aficyjnaj infarmacyi SAAZ, u 2024 hodzie kolkaść zachvarełych na adzior u Biełarusi akazałasia najbolšaj z 1995 hoda.
Kolkaść vypadkaŭ adru ŭ Biełarusi
Pakazčyk zachvorvańnia u 2024 hodzie skłaŭ 8,22 na 100 tysiač nasielnictva, havorycca ŭ dakumiencie. Siarod zaražanych było bolš darosłych, čym dziaciej (56,8%). U bolšaści nie było danych pra zroblenuju pryščepku.
Ułady zhadvali asobnyja vypadki adru ŭ 2024 hodzie ŭ Minsku, Bresckaj vobłaści, Lidskim, Žabinkaŭskim i Dobrušskim rajonach, ale nie ahučvali ahulnuju kolkaść zachvarełych u krainie. Zahadčyk adździaleńnia imunaprafiłaktyki adździeła epidemijałohii Respublikanskaha centra hihijeny, epidemijałohii i hramadskaha zdaroŭja Kirył Ihnataŭ na pres-kanfierencyi nie staŭ nazyvać ličby, spasłaŭšysia na adsutnaść danych pad rukoj.
Na momant składańnia ŭnutranaha dakładu Minzdaroŭja «epidemičny praces adru nie mieŭ praciahnieńnia». Pavodle danych čynoŭnikaŭ, apošni vypadak zachvorvańnia byŭ zarehistravany 24 kastryčnika 2024 hoda ŭ haradskim pasiołku Lozna Viciebskaj vobłaści. U 2025 hodzie pakul nie było paviedamleńniaŭ pra vypadki hetaj infiekcyi ŭ Biełarusi.
Darečy, situacyja z adrom za apošni hod pahoršyłasia pa ŭsioj Jeŭropie. U mai 2024 hoda SAAZ i JUNISIEF vypuścili sumiesnuju zajavu i zaklikali pryniać terminovyja miery dla baraćby z uspyškaj zachvorvańnia. Pa vynikach 2024 hoda kolkaść vypadkaŭ chvaroby ŭ Jeŭropie padvoiłasia, u Rasii — vyrasła amal u dva razy, va Ukrainie — uźlacieła ŭ siem razoŭ.
Kolkaść vypadkaŭ koklušu padvoiłasia
Kokluš — jašče adna chvaroba, jakoj biełarusy stali chvareć prykmietna čaściej. Z unutranaha dakumienta Minzdaroŭja vynikaje, što za ŭvieś 2024 hod u krainie zarehistravali 2002 vypadki koklušu. Heta ŭ 2,27 raza bolš, čym hodam raniej (881 vypadak).
Pavodle dadzienych SAAZ, kolkaść vypadkaŭ infiekcyi ŭ 2024 hodzie akazałasia «rekordnaj» dla Biełarusi za apošnija 15 hadoŭ.
Pakazčyk zachvorvańniaŭ pa krainie skłaŭ 22,09 na 100 tysiač nasielnictva, padličyli čynoŭniki. Pry hetym 91,8% zachvarełych byli dzieci.
Hetyja ličby taksama nie publikavalisia, choć pradstaŭniki sistemy achovy zdaroŭja paviedamlali pra rost kolkaści vypadkaŭ, asabliva siarod dziaciej 7—14 hadoŭ. U listapadzie 2023 hoda na rost zachvorvańniaŭ koklušam źviartała ŭvahu ŭ svaim Instagram piedyjatr z Homiela Zoja Dobyš.
— Strašnaja infiekcyja, pra jakuju ŭsie zabylisia. Byli sparadyčnyja vypadki. Ciapier try hady «karony», pieraboi z vakcynacyjaj, rost antypryščepačnaha ruchu — i kokluš pajšoŭ uharu, — adznačała jana.
Na žal, heta taksama mižnarodny «trend»: u 2024 hodzie rost kolkaści vypadkaŭ koklušu zafiksavali ŭ Jeŭrasajuzie (u adnoj tolki Polščy — u 35 razoŭ bolš, čym hodam raniej), ZŠA i Ukrainie.
U Rasii ŭspyška chvaroby prypała na 2023 hod (kolkaść vypadkaŭ pavialičyłasia ŭ 15 razoŭ), a dalej adbyŭsia peŭny spad zachvorvańniaŭ.
-
Žonka dyrektara JERAM, hrošy na zmahańnie z ankałohijaj dla jakoj źbirali ŭsim śvietam, uvajšła ŭ remisiju
-
U adnym z rehijonaŭ Biełarusi ŭspyška niebiaśpiečnaha virusa — jak abaranicca
-
26‑hadovaja ciažarnaja ŭ Dziaržynsku pamierła praź biełaruski antybijotyk, jaki raniej užo zabaraniali — bo ad jaho zahinuła niekalki žančyn
«Čamu ja pavinien dakazvać, što nie darmajed?» Pradprymalnika z Homiela pamyłkova zapisali ŭ niezaniatyja — jon daviedaŭsia tolki paśla vializnych rachunkaŭ za kamunałku16
Kamientary