I prosiać viarnuć na scenu pastanoŭku biełaruskaha metra.
Uviečary piatnicy 11 krasavika ŭ opiernym teatry ŭ Minsku adbyłasia premjera viečara adnaaktavych baletaŭ «Skoki» («Balero», «Skoki śmierci», «Karmen»), jaki rasčaravaŭ zaŭziatych staličnych teatrałaŭ.
Ahulnuju dumku pra pastanoŭku adrazu pa zakančeńni dziejstva vykazała ŭ tyktoku karystalnica pad nikam Olviraworld.
«Darahi, šanoŭny opierny teatr i administracyja teatra. Tolki što vyjšła z premjery baleta «Balero. Karmen». Skažu tak: śviatoje čapać nielha. Hetaja pastanoŭka tak spaskudziła muzyku… Viarnicie na scenu pastanoŭku Jelizarjeva — «Balero», «Karmen-siuita». Uvieś parter, prynamsi pobač sa mnoj, siadzieŭ i byŭ niezadavoleny. Heta nastolki apahanić śviatoje! Jelizarjeŭ — heta maštab, jaho nielha čapać. Balety «Karmen-siuita» i «Karmina Burana» — vydatnaja para, viarnicie ich na scenu», — padzialiłasia ŭražańniami žančyna.
Jaje padtrymali kamientatary, jakija taksama pabyvali na premjery:
«Dziakuj za adekvatnuju acenku — nas šmat. Heta byŭ kašmar».
«Jak vy dalikatna padbirajecie słovy. Cichi kryk dušy».
«Učora taksama byli. Karmen mianie dabiła».
«Tak, vodhuki ŭžo pajšli! Ludzi ŭ šoku, u rospačy, što našy dzieci bačać hetu dzič».
«Całkam z vami zhodnaja! Bałahan, pa-inšamu nazvać nielha!»
Kamientatary adznačajuć, što paśla taho, jak u mai 2024 hoda narodny artyst Valancin Jelizarjeŭ pajšoŭ z pasady mastackaha kiraŭnika opiernaha teatra, teatr zusim skaciŭsia.
«Žudasnyja pastanoŭki, a jakija pačvarnyja kaściumy i dekaracyi — jak z Ali-ekspres»,
«U Vialikim adbyvajecca biaźmiežža!!! Čamu Ministerstva kultury na heta zapluščvaje vočy! Vierch pošłaści i biezhustoŭščyny! Jak ža my raniej hanarylisia našym opiernym!» — aburajucca hledačy.
Rasčaravanyja svaim teatram hledačy ciapier imknucca naviedvać vyklučna hastrolnyja pastanoŭki. Praŭda, akramia rasijskich teatraŭ apošnija hady Biełaruś mała chto naviedvaje.
Balet «Skoki», jaki pryjšoŭsia nie daspadoby biełarusam, pastaviŭ Ihar Kołb, załužany artyst Rasii, jaki byŭ zaprošany na pasadu hałoŭnaha baletmajstra teatra ŭ 2022 hodzie, jašče pry Jelizarjevie. Kołb naradziŭsia i vučyŭsia ŭ Biełarusi, ale 26 hadoŭ prapracavaŭ u pieciarburhskim Maryinskim teatry pierad tym, jak viarnucca na Radzimu.
Dyryžoram-pastanoŭščykam baleta vystupiŭ Arciom Makaraŭ, narodny artyst Respubliki Baškartastan, jaki staŭ hałoŭnym dyryžoram teatra ŭ 2023 hodzie.
Hetaja pasada była z 2020 hoda vakantnaj. U toj hod, kali jašče pratesty byli ŭ svajoj najvialikšaj sile, 24 žniŭnia hałoŭnym dyryžoram byŭ pryznačany Viačasłaŭ Čarnucha-Volič, ale ŭžo praz dva dni, 26 žniŭnia, jon pakinuŭ pasadu pa vielmi dziŭnaj pryčynie.
Kalektyŭ teatra, jaki ŭdzielničaŭ u pratestach, źviedaŭ paśla palityčnyja čystki. U tym liku byli zvolnieny dyryžory Andrej Hałanaŭ, Ivan Kaściachin i Aleh Lasun.
Jak i inšyja biełaruskija teatry, kab zakryć kadravyja pytańni, narmalizavany opierny teatr byŭ vymušany pabiracca pa haradach Rasii — śpiecyjalisty ź inšych krain amal niedastupnyja, a padrychtavać ułasnyja kadry biełaruskaja sistema akazałasia niazdolnaja.
«Naša Niva» — bastyjon biełaruščyny
PADTRYMAĆCiapier čytajuć
Jak u halečy śpivałasia radnia Łukašenki? Małaviadomyja fakty29
Kamientary