Trajuradnaja siastra Uejna Hrecki sa Śvisłačy raskazała pra padarunak ad lehiendarnaha kanadca i što padaryła jamu ŭ adkaz

Dzied Hrecki Ciarencij rodam ź Biełarusi, razam z žonkaj i synam Zinoŭjem u pačatku XX stahodździa vyjechaŭ u Kanadu. Paźniej jahonaja žonka ź dziećmi viarnułasia na radzimu, a dzied budučaha chakieista zastaŭsia ŭ Kanadzie zarablać dalej. Uźjadnacca siamji ŭžo nie atrymałasia. Ciarencij Hrecki paśla stvaryŭ novuju siamju, u jakoj naradziŭsia baćka Uejna Hrecki. Halina Zinoŭjeŭna Sałdacienkava, u dziavoctvie Hreckaja, — unučka Ciarencija Hrecki.

— Sustrełasia ŭ 2010 hodzie (z Uejnam Hrecki, jaki ŭ jakaści hościa pryjazdžaŭ u Minsk na matč zorak KCHŁ). Praź pierakładčyka asabliva nie parazmaŭlaješ… Asabliva pieršy raz. Ja skazała, što vielmi škada, što my dzieda nie bačyli, a jon choć asabista bačyŭ i moža niešta pra jaho raskazać. Hrecki koratka raskazaŭ.

Jon ža nam dźvie plaški vina ŭ Minsku padaryŭ. Hetyja butelki ŭ nas dahetul zachoŭvajucca. Ja kažu dzieciam: «Davajcie chacia b pasprabujem. Heta ž 15 hadoŭ užo tym butelkam».

U majoj siamji byli listy ad dziaduli z Kanady. Šmat było jaho fatahrafij z novaj siamjoj. I jany, unuki. Jon na hanku svajho doma. Ale ŭsio zhareła, kali ŭ mamy, u našym baćkoŭskim domie, u 1984 hodzie adbyŭsia pažar. Usio zhareła, ja nie paśpieła zabrać… Ja jamu heta ŭsio raspaviadaju, a jon, napeŭna, dumaŭ: «Pryjechali tut pahrecca». Padumaŭ, moža, što my niešta chočam. A nam ničoha nie treba. Było tak cikava pierakanacca, što jon sapraŭdy naš svajak. Ale jon i nie admaŭlaŭ hetaha.

Ci byli jašče niejkija kantakty paśla 2010 hoda? Nie. Kali pryjechali ź Minska, ja napisała list na imia baćki Uejna, raspaviała, što była sustreča ŭ Minsku, što parazmaŭlali, uspaminali (pra ahulnych svajakoŭ).

Zaprasiła ich u hości, naviedać miaściny, dzie naradziŭsia dzied. Dziaduli ŭžo tady nie było ŭ žyvych. Zaprašała ŭsich, (pisała), što my budziem rady. Ale jany nie adkazali.

Tady ŭručyła chakieistu časopis z artykułam pra jaho. Maja svajačka kupiła ŭ Hiermanii hety časopis na anhlijskaj movie. Ja pakazała jamu, što my cikavimsia, čytajem pra jaho. Jon aŭtohraf pastaviŭ na im. My niadoŭha sustrakalisia, chvilin 10—15. Było składana (znajści čas u hrafiku chakieista). My na chadu źbiralisia ŭ Minsk, niejkija padarunki, suvieniry prychapili, kab nie z pustymi rukami. Nam patelefanavali, skazali chutčej jechać u Minsk, a to nie paśpiejem.

Suvieniry? Na chadu kupiła ŭ Vaŭkavysku suvieniry — niejki dzied (fihurka) u nacyjanalnym biełaruskim adzieńni, biełaruskija šakaładki, vialikaja karobka cukierak-asarci i niešta jašče.

Nie było kali dumać, śpiašalisia ŭ Minsk. Drenna, što tady na sustrečy ŭ mianie nie było ni fatahrafij, ni listoŭ (ad dzieda). Tak by ja pakazała, i ŭsio stała b zrazumieła, — cytuje Sałdacienkavu RIA Sport.

Sałdacienkava dadała, što ŭ cełym joj było b cikava sustrecca z kanadskimi svajakami, u tym liku z Uejnam Hrecki. «Chto viedaje… Moža być, ja nie suprać», — skazała jana.

U toj ža čas žančyna padkreśliła, što razumieje: va ŭsich užo svajo žyćcio, i ciažka padtrymlivać suviazi praz pakaleńni. «U jaho tam svaja siamja. Čuła, pamior jaho baćka… Moža, dumaju, było b cikava ŭnukam (Sałdcienkavaj) paznajomicca, kantakt ź dziećmi ciotki Oli (dačka dzieda Ciarencija ad pieršaha šlubu, jakaja zastałasia ŭ Kanadzie i nie źjechała ŭ Biełaruś) naładzić», — dadała Sałdacienkava.

U niadzielu rasijski chakieist, forvard «Vašynhton Kepitałz» Alaksandr Aviečkin u matčy suprać «Ńju-Jork Ajlenders» adznačyŭsia šajbaj, jakaja stała dla jaho 895-j u karjery ŭ čempijanatach NCHŁ. 39-hadovy rasijanin staŭ adzinaasobnym rekardsmienam lihi, apiaredziŭšy kanadca Uejna Hrecki.

• 2
• 0
• 2
• 0
• 1
• 1
• 0
• 3