Kolkaść zahinułych u vyniku rasijskaha ŭdaru pa Kryvym Rohu dasiahnuła 18 čałaviek, pałova — dzieci
U piatnicu viečaram Kryvy Roh padvierhsia spačatku rakietnamu rasijskamu abstrełu, u vyniku jakoha, pavodle apošnich danych, zahinuli 18 čałaviek, zatym — nalotu bieśpiłotnikaŭ, paviedamili ŭłady Dnieprapiatroŭskaj vobłaści.
U Minbarony Rasii śćviardžajuć, što nanieśli rakietny ŭdar «pa miescy praviadzieńnia narady z kamandzirami złučeńniaŭ i zachodnimi instruktarami». Ukrainskija ŭłady kažuć, što ataka pryjšłasia pa žyłym rajonie pobač ź dziciačaj placoŭkaj.
Mer horada Alaksandr Viłkuł napisaŭ, što rasijskija vajskoŭcy «ŭdaryli balistyčnaj rakietaj u centr žyłoha mikrarajona», «pobač ź dziciačaj placoŭkaj». Pavodle jaho słoŭ, «rakieta vybuchnuła ŭ pavietry — śpiecyjalna, kab bolš paciarpieła ludziej».
Pavodle apošnich danych zahinuli 18 čałaviek, i pałova ź ich — dzieci. Kiraŭnik Dnieprapiatroŭskaj AVA Siarhiej Łysak udakładniŭ, što paciarpieli 61 čałaviek — siarod ich 12 dziaciej.
«U balnicach znachodziacca 40 haradžan. Astatnija pad ambułatornym nazirańniem», — napisaŭ jon.
Pavodle jaho słoŭ, samamu maleńkamu paciarpiełamu ad ataki — 3 miesiacy. U jaho rezanyja rany, udakładniŭ kiraŭnik Dnieprapiatroŭskaj AVA.
Taksama atrymali paškodžańni niekalki šmatkvaternych damoŭ — heta piaci-, dzieviaci– i čatyrnaccacipaviarchoviki. U niekatorych damach adsutničaje haz, dadaŭ Alaksandr Viłkuł.
Minbarony Rasii ŭdar pa Kryvomu Rohu paćvierdzili. U rasijskim vajennym viedamstvie śćviardžajuć, što jon byŭ naniesieny «rakietaj z fuhasnym snaradam pa miescy praviadzieńnia narady z kamandzirami złučeńniaŭ i zachodnimi instruktarami ŭ adnym z restaranaŭ horada Kryvy Roh».
U Hienštabie Ukrainy hetu zajavu nazvali chłuśnioj, dadaŭšy, što rakieta «Iskander-M» trapiła ŭ «žyły masiŭ i dziciačuju placoŭku».
«Čarhovym parušeńniem normaŭ mižnarodnaha humanitarnaha prava padstupny vorah demanstruje, što zusim nie imkniecca da miru, zatoje maje metaj praciah zachopnickaj vajny na źniščeńnie suprać Ukrainy i ŭsich ukraincaŭ», — havorycca ŭ zajavie Hienštaba.
Udar pa Kryvomu Rohu supaŭ z bryfinham Uładzimira Zialenskaha, dla jakoha Kryvy Roh — rodny horad. U pačatku bryfinhu Zialenski zajaviŭ: «Heta tvar rasijskich, jon, u pryncypie, nie źmianiajecca z pačatku hetaj vajny, — udaryli pa dziciačaj placoŭcy».
Akramia taho, adkazvajučy na pytańni pra «čyrvonyja linii» dla Ukrainy na mirnych pieramovach i mahčymaść vieści pieramovy z rasijskim bokam napramuju, prezident Ukrainy adkazaŭ: «Jak razmaŭlać napramuju z balistyčnymi rakietami?»
Ciapier čytajuć
Staŭ viadomy prysud eks-pamočniku Łukašenki Iharu Bryło4
Kamientary