305 rubloŭ za cukarnicu, 456 za zavarnik: ceny ŭ anłajn-kramie Śviata-Jelisaviecinskaha manastyra šakujuć
Śviata-Jelisaviecinski manastyr časta paprakajuć u tym, što heta ŭžo nie relihijnaje miesca, a handlovy centr. Zarablajuć tut na ŭsim. My vyrašyli pahladzieć što i za jakija hrošy pradajecca ŭ manastyrskaj anłajn-kramie.
Siarod vodhukaŭ na Śviata-Jelisaviecinski manastyr možna pabačyć takija: «Vielmi pryhoža, ale biez hrošaj tam ciabie nie čakajuć. Darečy, prymajuć lubuju valutu. Kartkaj raźličycca nielha».
Ale biznes hety sučasny i, kaniečnie, maje anłajn-kramu. Cikavy momant: usie ceny paznačany tam vyklučna ŭ rasijskich rublach (dla zručnaści my pieraviali ŭsio ŭ biełaruskija).
Naprykład, za 102 rubli možna zamović «padarunkavy nabor dla mužčyny ŭ mašynu». U jaho ŭvachodzić ikona pad daŭninu, padvieska-miedaljon, kryž, skuranyja pacierki, birulka i paštoŭka.
Nabor ź piaci matrošak «Siamja śviatara» kaštuje pryblizna 130 rubloŭ. Za šklanuju padviesku «Anioł» u technicy cifani prosiać kala 390 rubloŭ.
Pradstaŭlena šmat kieramiki. Naprykład, samaja darahaja cukarnica «Uśmieška» (z reljefnym malunkam) pradajecca za 305 rubloŭ. Da jaje ŭ kamplekt možna ŭziać kieramičny zavarnik «Uśmieška» za 456 rubloŭ. Kubačak dla harbaty sa spodačkam z toj ža kalekcyi abyjducca ŭ 290 rubloŭ. Ale jość i tańniejšyja varyjanty.
Pradajucca i prysmaki. Za posnuju 90-hramovuju šakaładku pryjdziecca zapłacić kala 9 rubloŭ (heta ŭdvaja daražej za šakaładku Nestle ci spartakaŭskuju «Alonku» na sajcie «Jeŭraopta»).
Darečy, heta daloka nie adziny biznes Śviata-Jelisaviecienskaha manastyru. U ich jość ułasny stamatałahičny kabiniet «Manastyrski lekar». Zarablajuć i na svaim hateli, jaki nazyvajuć Domam pałomnika. Pry hetym u vodhukach pišuć, što miesca sapraŭdy vyhladaje šykoŭna.
Spynicca tut moža luby achvotny. Dla nierelihijnych haściej praduhledžany numary pavyšanaj kamfortnaści — mebla ŭ ich ź ćviordych parod draŭniny, jość artapiedyčnyja matracy i kandycyjaniery.
Ale nie samaje ŭdałaje miescaznachodžańnie — niedaloka znachodzicca Respublikanski navukova-praktyčny centr psichičnaha zdaroŭja, bolš viadomy jak Navinki.
Paznačana, što numar pavyšanaj kamfortnaści na dvaich kaštuje 120 rubloŭ za noč.
Taksama Śviata-Jelisaviecinskamu manastyru ŭłady dazvolili pakinuć ich pryvatnuju škołu «Ichvis» (paśla masavaj začystki ŭ Biełarusi zastałosia ŭsiaho 6 pryvatnych škoł). Adukacyja tam taksama płatnaja. Raniej na forumach pisali pra košt 300 jeŭra štomiesiac. Ale bonusam idzie vielmi šmat prapahandy.
Nahadajem: Śviata-Jelisaviecinski manastyr aktyŭna padtrymlivaje vajnu va Ukrainie nie tolki humanitarnaj dapamohaj rasijskim vajskoŭcam, ale i dobraachvotnikami. Raniej paviedamlałasia, što «Brat Aleh» z manastyra zaklučyŭ kantrakt ź Ministerstvam abarony Rasii i adpraŭlajecca na vajnu. I heta byŭ nie pieršy taki vypadak.
Mužčyna, jaki žyvie pry Śviata-Jelisaviecinskim manastyry, pajedzie na vajnu z Ukrainaj. I heta ŭžo nie pieršy taki vypadak
Jakija pasłuhi anłajn prapanujuć za hrošy biełaruskija chramy. Možna navat nabyć abaniemient!
Śviata-Jelisaviecinski manastyr šle listy katalickim hramadam u Jeŭropie. Ich źmiest vas ździvić
Ihumieńnia Haŭryiła atrymała ŭznaharodu za dapamohu rasijskamu bataljonu, jaki ŭdzielničaje ŭ napadzie na Ukrainu
Kamientary