Kala budynka litoŭskaha Siejma 25 sakavika prajšła cyrymonija ŭźniaćcia biełaruskaha nacyjanalnaha ściaha. U cyrymonii adznačeńnia hadaviny padziei ŭziali ŭdzieł kala 100 čałaviek, u tym liku Śviatłana Cichanoŭskaja, pradstaŭniki jaje ofisa, litoŭskija deputaty, u tym liku pieršy vice-śpikier Siejmu Juozas Alekas, zamiežnyja dypłamaty, pradstaŭniki biełaruskaj dyjaspary, piša Radyjo Svaboda.
Prahučaŭ biełaruski himn «My vyjdziem ščylnymi radami», chvilinaj maŭčańnia prysutnyja ŭšanavali pamiać tych, chto zahinuŭ za niezaležnaść Biełarusi.
Śviatłana Cichanoŭskaja na mitynhu skazała, što vielmi hanarycca bieł-čyrvona-biełym ściaham, jaki staŭ simvałam niezaležnaści i niaskoranaści biełarusaŭ. Jana ŭzhadała, jak 107 hadoŭ tamu była abvieščana niezaležnaść Biełarusi ŭ Minsku, i tady ž aficyjna źjaviŭsia jaje ściah, ź jakim doŭha zmahalisia «stalinisty i inšyja vorahi biełaruščyny».
— Ale biełarusy jaho znoŭ i znoŭ vynosili na vulicy. Ja z honaram hladžu na hety ściah. I vieru, što pakul łunaje hety ściah, pakul jość biełaruskaja mova, pakul jość našy sajuźniki — takija, jak Litva i inšyja krainy Eŭropy, nia źniknie viera, što Biełaruś jak niezaležnaja kraina adnovicca. My projdziem uvieś šlach da svabody, adrodzim našu prynaležnaść da Jeŭropy, da jakoj histaryčna naležym, — skazała jana.
Vystupajučy z trybuny Siejma Litvy, Śviatłana Cichanoŭskaja nahadała, što Litva adnoj ź pieršych pryznała niezaležnaść BNR u 1918 hodzie, paźniej pryniała pieršy ŭrad u vyhnańni, a ŭ studzieni 1991-ha ŭžo biełarusy razam ź litoŭcami baranili svabodu kala parłamienta i televiežy ŭ Vilni.
— Biełarusy i litoŭcy razam udzielničali ŭ vyzvolnych paŭstańniach suprać Rasijskaj impieryi, razam pieražyvali pryhniot savieckaj akupacyi. Našaje siabroŭstva budujecca nie tolki na hieahrafii, ale na ahulnych ideałach i kaštoŭnaściach. I siońnia, siarod inšaha, my ŭšanoŭvajem historyju našaha supolnaha zmahańnia za svabodu, — padkreśliła jana.
— Naša meta — vyrvacca z-pad rasijskaj akupacyi, z-pad tyranii Łukašenki i viarnuć Biełaruś u jeŭrapiejskuju siamju narodaŭ. My razumiejem, što vyzvaleńnie Biełarusi — heta naša zadača i naš abaviazak. Ale my nie zmožam hetaha zrabić biez sajuźnikaŭ.
Da takich sajuźnikaŭ jana adniesła Litvu, i padziakavała ŭsim dziejačam, jakija padtrymlivali Biełaruś.
Ciapier čytajuć
«Jon kazaŭ, što zołata z saboj nie zabiareš, lepiej zrabić niešta dla inšych». Dačka biznesmiena Kalina raskazała, jak razam z bratam čakaje jaho z kałonii
Kamientary