Student histfaka BDU, jakoha katavali ŭ milicyi padčas pratestaŭ. Raskazvajem pra zahinułaha kalinoŭca Alaksandra Sieradu
Paśla zatrymańniaŭ chłopcam zacikaviŭsia KDB, i jon źjechaŭ u Polšču.
22-hadovy ŭradženiec Chojnikaŭ Alaksandr «Łyč» Sierada zahinuŭ padčas vykanańnia bajavoha zadańnia na poŭdni Ukrainy ŭ pačatku sakavika 2025 hoda. Raźvitańnie z bajcom pałka Kalinoŭskaha prajšło siońnia ŭ Kijevie. Pabracimy nie nazyvali sapraŭdnaje imia «Łyča», ale prałukašenkaŭskija prapahandysty jašče niekalki dzion tamu paviedamili pra hibiel Sierady.
Siabar Alaksandra raspavioŭ «Našaj Nivie», jakim čałaviekam toj byŭ.
Alaksandr Sierada naradziŭsia ŭ Chojnikach, vučyŭsia na histaryčnym fakultecie BDU. Pryčym pajšoŭ u biełaruskamoŭnuju hrupu. Jon paśpieŭ skončyć pieršy kurs, a potym zdaryłasia leta 2020 hoda. Ź pieršych dzion Alaksandr dałučyŭsia da akcyj pratestu.
Pieršy raz chłopca zatrymali jašče ŭ červieni 2020 hoda, u apošni dzień zboru podpisaŭ za kandydataŭ u prezidenty. Adnak tady Alaksandra vyzvalili, bo jon byŭ niepaŭnaletnim (18 hadoŭ jamu spoŭniłasia ŭ kancy lipienia).
Alaksandr prajšoŭ praz žorstkija katavańni ŭ Frunzienskim RUUS u paślavybarčyja dni. Jaho možna pabačyć na źlitych milicejskich videa, apublikavanych «Biełpołam».
Vidavočcy kazali, što Alaksandra katavali niekalki hadzin, jon nieadnarazova hublaŭ prytomnaść. Potym chłopca adpravili na Akreścina.
«Što jaho charaktaryzuje jak čałavieka — tatalnaja niazłomnaść. Nie było takich katavańniaŭ i pieraškod, jakija b mahli b jaho supynić», — kaža siabar.
Alaksandr zajmaŭsia ciažkaj atletykaj. Siabar chłopca adznačaje, što z takimi danymi jon moh by stać paśpiachovym spartsmienam.
Paśla pratestaŭ Sieradoj zacikaviŭsia KDB, i jon źjechaŭ u Polšču.
Alaksandr nie hublaŭ suviaź ź siabrami, pieryjadyčna pierapisvaŭsia ź imi. Ale nikoli nie raspaviadaŭ, što vyrašyŭ pajechać va Ukrainu.
— Pa ščyraści, što my čakali ad jaho takoha z samaha pačatku vajny. Ja b skazaŭ, što jon byŭ našym Alošam Papovičam: vielmi dobrym, vielmi mocnym fizična, ź vialikim sercam. Moža, jon byŭ naiŭnym, ale mocna lubiŭ ludziej i Biełaruś.
Siabar kaža, što ŭ Alaksandra było składanaje žyćcio, pa jakim jon išoŭ samotna. Chłopca paraŭnoŭvali z Hatsam z «Biersierka» — i praź fizičnyja dadzienyja, i praz toje, jak jon pakutavaŭ.
Ciapier čytajuć
Babaryka: Kali b my pieramahli — vajny va Ukrainie nie było b31
Babaryka: Kali b my pieramahli — vajny va Ukrainie nie było b
Babaryka turemščykam: «U mianie było, ciapier niama, ale jość šaniec, što budzie. A ŭ vas nie było, niama i nie budzie. I ŭ vašych dziaciej nie budzie»88
Kamientary