Microsoft aficyjna zakryvaje Skype paśla 22 hadoŭ pracy miesiendžara
Microsoft aficyjna abjaviła pra spynieńnie padtrymki Skype ŭ mai 2025 hoda.
Microsoft aficyjna paćvierdziła, što ŭ mai 2025 hoda spynić padtrymku Skype. Karystalnikam prapanujecca pierachodzić na Microsoft Teams, jaki ŭžo daŭno staŭ pryjarytetnaj płatformaj kampanii, piša Securitylab.
Paviedamleńnie ab zakryćci Skype było vyjaŭlena ŭ apošniaj testavaj viersii prahramy dla Windows. U im havorycca: Pačynajučy z maja, Skype bolš nie budzie dastupny. Praciahvajcie zvanki i čaty ŭ Teams».
Taksama dadatak paviedamlaje karystalnikam, što niekatoryja ich kantakty ŭžo pierajšli na Teams Free. Microsoft Teams stanovicca asnoŭnaj kamunikacyjnaj płatformaj kampanii jak dla biznesu, tak i dla zvyčajnych karystalnikaŭ.
Skype zapuščany ŭ 2003 hodzie. U 2011 hodzie servis nabyŭ Microsoft i pačaŭ aktyŭna jaho prasoŭvać, navat zakryŭšy dziela hetaha Windows Live Messenger.
U 2015 hodzie kampanija sprabavała intehravać Skype u Windows 10, stvaryŭšy asobnyja prahramy dla videazvankoŭ, paviedamleńniaŭ i zvyčajnych zvankoŭ. Ale praź dzieviać miesiacaŭ ad hetaha admovilisia, viarnuŭšysia da kłasičnaj Win32-viersii.
U 2017 hodzie Microsoft zapuściła Teams, jaki byŭ pabudavany na technałohijach Skype. Kampanija aktyŭna prasoŭvała novuju płatformu dla sumiesnaj pracy, robiačy zakryćcio Skype pytańniem času.
Kali ŭ 2021 hodzie vyjšła Windows 11, u sistemu ŭbudavali biaspłatnuju viersiju Teams zamiest Skype. Heta stała čarhovym sihnałam, što Microsoft admaŭlajecca ad staroha miesiendžara.
Ciapier heta aficyjna: z maja 2025 hoda karystalniki pačnuć atrymlivać apaviaščeńni pra nieabchodnaść pierachodu na Microsoft Teams.
Microsoft pakul nie dała aficyjnych kamientaryjaŭ nakont kančatkovaha zakryćcia Skype, ale rašeńnie ab spynieńni padtrymki ŭžo pryniata.
Kamientary