Spažyvańnie enierhii da siaredziny stahodździa pavialičycca amal na čverć, ale heta nie aznačaje, što budučynia za vykapniovym palivam.
Jak piša Bloomberg, pavodle novaha dakłada kampanii Shell Plc, štučny intelekt (ŠI) moža pryvieści da značnaha rostu enierhaspažyvańnia ŭ roznych halinach, ale adnačasova dapamahčy skaracić vuhlarodnuju intensiŭnaść enierhasistemy ŭdvaja da 2050 hoda.
Pavyšeńnie pradukcyjnaści dziakujučy ŠI, u tym liku aŭtamatyzacyja vytvorčaści, budzie spryjać istotnamu ekanamičnamu rostu.
Pry hetym spažyvańnie nafty da 2030-ch hadoŭ vyraście na 3—5 miljonaŭ barelaŭ u dzień, paśla čaho dasiahnie piku i pačnie pastupova źnižacca. Adnak vykarystańnie naftapraduktaŭ čakajecca navat u XXII stahodździ.
Vuhal jak krynica elektraenierhii pierastanie raści da 2030 hoda, a pryrodny haz — da 2035-ha, havorycca ŭ spravazdačy. Paśla hetaha novyja elektrahienieracyjnyja mahutnaści nie buduć dadavacca za košt hetych resursaŭ.
Dakład, apublikavany 12 lutaha 2025 hoda, staŭ pieršym hłabalnym ahladam enierhietyčnaha rynku za dva hady ad Shell i ŭpieršyniu ŭklučaje scenaryi z ŠI. U dakumiencie, padrychtavanym navukoŭcami i ekanamistami kampanii, razhladajucca try mahčymyja scenaryi raźvićcia padziej. Usia jany pradkazvajuć pieravyšeńnie paroha ŭ +1,5°C, jaki byŭ uzhodnieny 196 krainami ŭ Paryžskim pahadnieńni 2015 hoda.
Adnak Shell prahnazuje paskareńnie skaračeńnia vuhlarodnych vykidaŭ u budučyja dziesiacihodździ. Pryčym, jak adznačajuć aŭtary, ŠI budzie spryjać źnižeńniu zabrudžvańnia va ŭsich enierhietyčnych sistemach — ad transpartu da vytvorčaści. Heta moža praduchilić pavyšeńnie siaredniaj hłabalnaj tempieratury na 3—4°C.
Scenaryi Shell prahnazujuć, što elektryčnaść stanie asnoŭnaj krynicaj enierhii dla transpartu, vytvorčaści i aciapleńnia, zamianiajučy naftu, haz i vuhal. Adnačasova technałohii vydaleńnia vuhlarodu buduć raźvivacca i stanavicca bolš dastupnymi, što dapamoža pastupova źnižać hłabalnyja vykidy CO₂ i zrobić enierhasistemu bolš ekałahičnaj.
«Luby analiz, nakiravany na dasiahnieńnie nulavych vykidaŭ CO₂ da 2050 hoda, pavinien u poŭnaj miery ŭličvać vykarystańnie technałohij kiravańnia i vydaleńnia vuhlarodu», — havorycca ŭ dakładzie.
Ciapier čytajuć
Zialenski ŭ Vilni: Pakul špic Łukašenki maje bolš pravoŭ, čym narod Biełarusi8
Kamientary
Vybrosy nikak nie vlijajut na iźmienienija tiempieratury.