APIEK+ admoviłasia pavialičvać zdabyču nafty nasupierak zakliku Trampa

Manitorynhavy kamitet kartela i jaho partnioraŭ, sustaršyniami jakoha źjaŭlajucca Rasija i Saudaŭskaja Aravija, vyrašyŭ nie mianiać biahučuju palityku pa zdabyčy nafty, paviedamiła APIEK u pres-relizie.

Źnižanyja bolš za dva hady tamu kvoty na zdabyču pakinutyja na biahučym uzroŭni, jak i ŭzhodnieny ŭ śniežni płan pa ich štomiesiačnym pavieličeńni ŭ pieryjad z krasavika pa kaniec 2026 hoda. Pa słovach delehataŭ, pytańnie ab zakliku Trampa pavialičyć pastaŭki nafty nie abmiarkoŭvałasia, piša Bloomberg.

Tramp pravioŭ pieradvybarčuju kampaniju pad łozunham «Śvidruj, dzietka, śvidruj», jaki jon paŭtaryŭ i ŭ svajoj inaŭhuracyjnaj pramovie. Užo praz try dni paśla zastupleńnia na pasadu, źviartajučysia pa videasuviazi da ŭdzielnikaŭ Suśvietnaha ekanamičnaha forumu ŭ Davosie, jon znoŭ paviedamiŭ pra namier adpuścić ceny na naftu i zaklikaŭ da hetaha krainy APIEK:

«Ja źbirajusia paprasić Saudaŭskuju Araviju i APIEK źnizić canu nafty. Jaje treba źnizić. Ščyra kažučy, ja ździŭleny, što jany nie zrabili hetaha da vybaraŭ [u ZŠA]».

Pa słovach Trampa, kali nafta patańnieje, centrabanki pa ŭsim śviecie «nieadkładna» źniziać pracentnyja staŭki. Tezis pra praźmiernuju darahoŭlu nafty fihuravaŭ i ŭ jahonych vykazvańniach pra vajnu va Ukrainie:

«Cana ciapier dastatkova vysokaja, kab hetaja vajna praciahvałasia. Treba źnizić canu na naftu, i heta spynić vajnu… Heta biezadkazna, što dahetul hetaha nie zrabili. My apuścim ceny na naftu, i Rasija adrazu spynić vajnu z Ukrainaj».

Vandała Chary, zasnavalnica sinhapurskaj Vanda Insights, skazała ŭ kamientaryi Bloomberg:

«Ja nie čakaju, što APIEK+ prysłuchajecca da patrabavańniaŭ abo prośbaŭ Trampa, jak ich ni nazavi. APIEK+ raspracoŭvaje stratehiju pastavak vielmi-vielmi staranna, vielmi tonka padładžvajučy jaje [pad situacyju na rynku]».

U minułym hodzie, kab padtrymać ceny na naftu, aljans naftazdabyvajučych krain trojčy adkładaŭ realizacyju płana pa pavieličeńni zdabyčy. Ciapier jon raźličvaje štomiesiac naroščvać jaje, pačynajučy z krasavika, na 120 000 barelaŭ za dzień i da kanca hoda viarnuć na rynak ahułam 2,1 młn barelaŭ.

Ale choć kartel u svajoj zajavie źviarnuŭ uvahu na mocnyja fundamientalnyja pakazčyki rynku i čakańnie adnaŭleńnia popytu na naftu z krasavika, mnohija ekśpierty sumniavajucca ŭ takim raźvićci padziej. Ekanomika Kitaja raście pavolna i imkliva pierachodzić na alternatyŭnyja krynicy enierhii, pry hetym zdabyča ŭ krainach Paŭnočnaj i Paŭdniovaj Amieryki raście.

Pavodle acenki Mižnarodnaha enierhietyčnaha ahienctva, u 2025 hodzie na suśvietnym rynku ŭtvorycca lišak u pamiery 750 000 barelaŭ u sutki, navat kali APIEK+ nie narościć zdabyču. Pa hetaj pryčynie Citigroup i JPMorgan Chase prahnazujuć, što jon znoŭ admovicca ad płanaŭ pavialičyć kvoty.

• 2
• 1
• 4
• 1
• 2
• 0
• 0
• 0