Tramp pačaŭ handlovuju vajnu z Kanadaj, Mieksikaj i Kitajem

Prezident ZŠA Donald Tramp padpisaŭ ukaz ab pošlinach na tavary z Kanady, Kitaja i Mieksiki. Dla KNR staŭka składzie 10%, dla Mieksiki — 25%, dla Kanady — 10% na enierharesursy i 25% na astatni impart.

Nie ŭdakładniajecca, kali pošliny nabuduć moc. Vysokapastaŭleny čynoŭnik skazaŭ ahienctvu AP, što bolš nizkaja staŭka dla nafty, hazu i elektraenierhii z Kanady źviazana z žadańniem minimizavać mahčymaje pavyšeńnie cen na bienzin ci kamunalnyja pasłuhi.

Prezident ZŠA Donald Tramp rastłumačyŭ rašeńnie nieabchodnaściu baraćby ź nielehalnaj imihracyjaj i narkahandlem, u pryvatnaści pastaŭkami fientaniłu ŭ ZŠA.

«My pavinny abaranić amierykancaŭ, i moj abaviazak jak prezidenta — zabiaśpiečyć biaśpieku ŭsich. U svajoj pieradvybarnaj kampanii ja paabiacaŭ spynić patok nielehalnych mihrantaŭ i narkotykaŭ, jakija pierasiakajuć našy miežy, i amierykancy ŭ pieravažnaj bolšaści prahałasavali za heta».

Tramp śćviardžaje, što pastaŭki fientaniłu z Kitaja traplajuć u ZŠA praź Mieksiku i Kanadu, pakolki hetyja krainy nie mohuć naležnym čynam achoŭvać svaje miežy. Jon abvinavaciŭ Kitaj u parušeńni abaviazacielstvaŭ pa skaračeńni vytvorčaści fientaniłu i zajaviŭ, što Kamunistyčnaja partyja Kitaja «subsidavała i zaachvočvała» kampanii da pastavak hetaha niebiaśpiečnaha rečyva ŭ ZŠA.

Pavyšeńnie pošlin — pieradvybarnaje abiacańnie Donalda Trampa. 

U svaju čarhu premjer-ministr Kanady Džaścin Trudo ŭ adkaz abviaściŭ ab maštabnych taryfach u pamiery 25%, jakija zakranuć amierykanskija tavary koštam 155 młrd dalaraŭ. 

Jon skazaŭ, što miaža pamiž ZŠA i Kanadaj «adna z samych nadziejnych i biaśpiečnych u śviecie». «Mienš za 1% fientaniłu, jaki pastupaje ŭ ZŠA, pastupaje z Kanady. Mienš za 1% nielehalnych mihrantaŭ, jakija pastupajuć u ZŠA, pastupajuć z Kanady, — zajaviŭ Trudo. — Handlovyja miery suprać Kanady — nie najlepšy sposab sumiesnaj pracy pa vyratavańni žyćciaŭ».

Prezident Mieksiki Kłaŭdyja Šejnbaum paabiacała, što taksama ŭviadzie ŭ adkaz jak taryfnyja, tak i nietaryfnyja miery dla tavaraŭ ZŠA, choć pakul nie paviedamiła padrabiaznaści.

Šejnbaum taksama nazvała zajavu Trampa ab tym, što mieksikanski ŭrad znachodzicca ŭ «niedapuščalnym sajuzie» z narkakartelami, paklopam na Mieksiku.

Kitaj adkazaŭ, što zajava Trampa surjozna parušaje praviły Suśvietnaj handlovaj arhanizacyi. «Kitaj vielmi niezadavoleny hetym i rašuča vystupaje suprać», — zajaviła Ministerstva handlu KNR. 

Kitaj padaść pazoŭ u SHA suprać ZŠA i prymie kontrmiery dla abarony svaich pravoŭ i intaresaŭ.

• 4
• 0
• 5
• 11
• 1
• 0
• 1
• 0