Tramp choča źmienšyć suśvietnyja ceny na naftu, kab skončyć vajnu va Ukrainie
Prezident ZŠA Donald Tramp zajaviŭ, što maje namier źviarnucca da Saudaŭskaj Aravii i APIEK, kab sumiesnymi namahańniami źnizić suśvietnyja ceny na naftu, što, pavodle jaho słoŭ, «imhnienna» moža spynić rasijska-ŭkrainskuju vajnu. Pra heta jon skazaŭ 23 studzienia padčas žyvoha ŭklučeńnia na Suśvietnym ekanamičnym forumie ŭ Davosie.
«Ja taksama źbirajusia paprasić Saudaŭskuju Araviju i APIEK źnizić canu nafty — vy pavinny jaje źnizić», — zajaviŭ Tramp.
Jon padkreśliŭ, što heta pavinna było adbycca jašče da prezidenckich vybaraŭ u ZŠA. Jak jon śćviardžaje, «kali b cana ŭpała, to rasijska-ŭkrainskaja vajna skončyłasia b imhnienna».
Tramp padkreśliŭ, što ciapier suśvietnyja ceny na naftu źjaŭlajucca dastatkova vysokimi, što spryjaje praciahu vajny va Ukrainie.
«Vy mahli b skončyć hetuju vajnu», — zajaviŭ prezident ZŠA, dadaŭšy, što heta źjaŭlajecca vialikaj adkaznaściu, pakolki, ź jahonych słoŭ, hinuć miljony ludziej.
Donald Tramp taksama adznačyŭ, što namahańni dla dasiahnieńnia mirnaha ŭrehulavańnia pamiž Rasijaj i Ukrainaj užo praciahvajucca. Jon padkreśliŭ, što padzieńnie cenaŭ na naftu dazvolić źnizić pracentnyja staŭki pa kredytach spačatku ŭ ZŠA, a zatym pa ŭsim śviecie.
Jon taksama vykazaŭ upeŭnienaść u raźvićci plonnaha ŭzajemadziejańnia z Saudaŭskaj Aravijaj u cełym, jakaja, pavodle jaho słoŭ, užo paabiacała inviestavać u Amieryku pa mienšaj miery $600 miljardaŭ.
«Ale ja paprašu naślednaha prynca, jaki źjaŭlajecca fantastyčnym chłopcam, akruhlić jaho prykładna da 1 tryljona dalaraŭ. Ja dumaju, što jany zrobiać heta, tamu što my vielmi dobra stavilisia da ich», — zaŭvažyŭ Tramp.
22 studzienia Tramp zajaviŭ, što jon nie choča nanosić škodu RF, adnak u jaho nie budzie inšaha vybaru, jak uvieści «vysokija padatki, taryfy i sankcyi» na tavary z Rasii, kali Maskva nie pojdzie na pahadnieńnie ab miry va Ukrainie.
Zialenski nazvaŭ umovaj pieramovaŭ z Rasijaj harantyi ad Trampa
Tramp zaklikaŭ Rasiju nieadkładna spynić vajnu, inačaj pahražaje krutymi mierami
Tramp daručyŭ svajmu śpiecpradstaŭniku zaviaršyć vajnu va Ukrainie za 100 dzion
Tramp moža pryvieści Pucina da krachu navat biez vajny. Treba tolki nie davać palohkaŭ pa nafcie
Ciapier čytajuć
22‑hadovy Viktar z-pad Klecka pratrymaŭsia na froncie miesiac. A paśla baćki pierasvarylisia, dzielačy hrabavyja7
Kamientary
Nakon nafty pabačym ..
Uhroza macniej čym dziejańnie..