1 lutaha na Biełastoččynie prajšoŭ KALINOŬSKI MARŠ 2025, prymierkavany da dnia narodzinaŭ Kastusia Kalinoŭskaha i ušanavańnia pamiaci hierojaŭ Paŭstańnia 1863-64 hadoŭ, piša «Svaboda».
Marš byŭ praviedzieny arhanizacyjaj «Ruch», partnerami vystupili Biełaruskaja dyjaspara Biełastoku, klub histaryčnaj rekanstrukcyi «Invictus 1863», Biełastockaja Charuhva i «Biełaruski dom».
Mierapryjemstva pačałosia ŭ miastečku Haradok, dzie štohod ładziłasia «Basovišča», a ciapier «Tutaka». Tut jość vulica Kastusia Kalinoŭskaha. Adtul udzielniki vystupili piešym maršam u bok vioski Strašava.
Piešy marš skłaŭ bolš za 5 kilametraŭ. U Strašavie ŭdzielniki ŭšanavali pamiać viadomaha biełaruskaha piśmieńnika i hramadzkaha dziejača Alaksieja Karpiuka, jaki naradziŭsia ŭ hetaj vioscy, a ŭ čas II Usiaśvietnaj vajny kiravaŭ partyzanskim atradam imia Kastusia Kalinoŭskaha.
Taksama aktyvisty ŭšanavali pamiać vybitnaha biełaruskaha vajskovaha i hramadzka-palityčnaha dziejača Mikołu Dziamidava, jaki naradziŭsia ŭ susiednim Haradku i byŭ svajakom Kastusia Kalinoŭskaha. Kala prydarožnaj kaplicy ŭskładzienyja vyjavy dziejačoŭ razam sa źničami.
Paśla ŭdzielniki maršu zładzili ŭžo aŭtaprabieh da vioski Mastaŭlany — miesca, dzie naradziŭsia Kastuś Kalinoŭski. Razam ź piešym maršam adlehłaść skłała 26 kilametraŭ — mienavita stolki hadoŭ pražyŭ nacyjanalny hieroj.
U Mastaŭlanach prajšła ŭračystaja častka mierapryjemstva. Jaje adkryŭ Vasil Kałač i inšyja pradstaŭniki klubu Invictus 1863, jakija stali na hanarovaj varcie kala pomnika, apranutyja ŭ paŭstanckija mundury. Prahramu praciahnuła Kaciaryna Vadanosava, jakaja pračytała ŭłasny vierš, pryśviečany paŭstańniu — «Kasinerski bal». U Mastaŭlanach zahučali zapaviety Jaśki, haspadara z-pad Vilni — «Listy z-pad šybienicy». Dalej Alaksiej Trubkin raskazaŭ pra raniejšyja ŭšanavańni pamiaci hierojaŭ paŭstańnia i historyju ŭstalavańnia pomniku ŭ Mastaŭlanach.
Ciapier čytajuć
Staruju kamianicu kala ratušy ŭ Mahilovie rychtavali dla haradskoha muzieja. Ciapier tam robiać ofis rasijskaha pasolstva na čale z byłym ministram «ŁNR»77
Kamientary