Kitaj i Indyja časova prypynili zakupki rasijskaj nafty z pastaŭkaj u sakaviku na fonie rostu vydatkaŭ na fracht tankieraŭ, jakija nie zakranutyja sankcyjami ZŠA, piša Radyjo Svaboda.
Pavodle ich słovaŭ, cana na rasijskuju syruju naftu ESPO, jakaja ekspartujecca z portu Kaźmina ŭ Cichim akijanie, vyrasła na 3—5 dalaraŭ za baral u paraŭnańni z markaj ICE Brent. Heta źviazana z rezkim pavyšeńniem stavak frachtu sudnaŭ. Naprykład, dla tankiera typu «Aframaks» pa maršrucie ŭ Kitaj jany pavialičylisia «na niekalki miljonaŭ dalaraŭ».
10 studzienia ZŠA ŭviali najbolš maštabny na siońniašni dzień pakiet amierykanskich sankcyjaŭ, jaki zakranuŭ dachody Rasii ad ekspartu nafty i hazu. Pad abmiežavańni trapili dźvie z čatyroch najbujniejšych rasijskich naftavych kampanij — «Hazpram nafta» i «Surhutnaftahaz», a taksama bolš za 180 tankieraŭ, jakija, miarkujecca, pieravozili rasijskuju naftu i naftapradukty ŭ abychod sankcyjaŭ zachodnich krainaŭ. Hetyja abmiežavańni vyklikali skačok cenaŭ na fracht tankieraŭ, bo niekatoryja pakupniki i party ŭ Kitai i Indyi admovilisia prymać sudny, jakija trapili pad sankcyi.
Finansavy dyrektar indyjskaj kampanii Bharat Petroleum Corp Ltd paviedamiŭ Reuters na minułym tydni, što kampanija nie atrymała nijakich novych prapanovaŭ na pastaŭki ŭ sakaviku, jak heta zvyčajna byvaje ŭ siaredzinie kožnaha miesiaca, i čakaje, što kolkaść prapanovaŭ na sakavik skaracicca ŭ paraŭnańni sa studzieniem i śniežniem.
Rasijskaja nafta składała 36% impartu Indyi i amal piatuju častku impartu Kitaja ŭ 2024 hodzie.
Pavodle danych analityčnaj kampanii Kpler, apošnija sankcyi zakranajuć tankiery, jakija pieravoziać kala 42% marskoha ekspartu nafty Rasiei, pieravažna ŭ Kitaj. ZŠA zapatrabavali ad Indyi razhruzić hetyja tankiery z rasijskaj naftaj da 27 lutaha i zrabić za ich płaciažy da 12 sakavika. U Kitai sudny, jakija trapili pad abmiežavańni, sutykajucca sa spaźnieńniami pry vyhruzcy nafty, niahledziačy na časovuju vyzvalenaść ad sankcyj.
Pavodle danych Kpler, impart syroj nafty z Rasii ŭ Kitaj źniziŭsia da minimumu za šeść miesiacaŭ na minułym tydni i składaje 717 tysiač barelaŭ na dzień.
Što tyčycca Indyi, pieraboi ŭ pastaŭkach rasiejskaj syroj nafty dasiahajuć 450 tysiač barelaŭ na sutki, adznačaje Reuters. Indyjskija naftapierapracoŭčyja zavody šukajuć alternatyŭnyja pastaŭki z krainaŭ Blizkaha Uschodu, Afryki i ZŠA na sakavik i krasavik, bo čakajuć skaračeńnia pastavak z Rasiei, paviedamlaje ahienctva.
Ciapier čytajuć
Pa padazreńni ŭ zabojstvie ciažarnaj minčanki zatrymali chakiejnaha sudździu Alaksieja Haŭrylonka4
Kamientary