Prezidenta Paŭdniovaj Karei aryštavali — choć i nie ź pieršaj sproby
Heta pieršy ŭ historyi Paŭdniovaj Karei aryšt dziejnaha — choć i adchilenaha ad vykanańnia abaviazkaŭ — prezidenta, piša Bi-bi-si.
Paśla šmathadzinnaha supraćstajańnia ŭ rezidencyi prezidenta śledčyja hetym razam zmahli dastavić Jun Sok Jola na dopyt u Biuro rasśledavańnia karupcyi (najvyšejšych słužbovych asobaŭ).
Jun pierad hetym apublikavaŭ karotki videazvarot, u jakim zajaviŭ, što pa-raniejšamu ličyć aryšt niezakonnym, ale vyrašyŭ padparadkavacca śledčym i palicyi, kab paźbiehnuć krovapralićcia.
«Choć hetaja sprava i niezakonnaja, ja vyrašyŭ źjavicca ŭ Biuro rasśledavańnia karupcyi, kab praduchilić niepatrebnaje krovapralićcie. Ale heta nie aznačaje, što ja zhadžajusia z tym, što jany adkryli spravu», — zajaviŭ prezident.
Jon taksama dadaŭ, što ŭ krainie parušajecca pryncyp viaršenstva prava, i što ni śledčyja orhany, jakija adkryli spravu suprać jaho, ni sud, jaki vydaŭ ordar na aryšt, nie mieli na heta pravoŭ.
U pačatku śniežnia prezident Paŭdniovaj Karei sprabavaŭ praciahvać baraćbu z apazicyjaj, jakaja atrymała kantrol nad parłamientam, radykalnymi sposabami: jon biespaśpiachova sprabavaŭ uvieści ŭ krainie vajennaje stanovišča. Paśla hetaha parłamient abvinavaciŭ jaho ŭ sprobie miaciažu i 14 śniežnia abviaściŭ kiraŭniku dziaržavy impičmient.
Jun adchileny ad vykanańnia prezidenckich abaviazkaŭ, ale dla taho, kab pazbavić jaho pasady, impičmient pavinien być uchvaleny Kanstytucyjnym sudom. Pakul sud nie pryniaŭ rašeńnia, Jun Sok Jol aficyjna zastajecca prezidentam.
Sam Jun jašče ŭ pieršaj pałovie śniežnia adchiliŭ abvinavačańni ŭ sprobie miaciažu i zajaviŭ, što ŭviadzieńnie vajennaha stanovišča było «palityčna vyvieranym rašeńniem», i jon pryniaŭ jaho, kab abaranić dziaržavu ad apazicyi, jakaja, pa jahonych słovach, paralizavała pracu ŭrada.
U pieršy raz śledčyja sprabavali aryštavać Juna 3 studzienia, ale achova prezidenta nie dała im heta zrabić, i paśla niekalkich hadzin supraćstajańnia śledčyja i palicyja pakinuli rezidencyju prezidenta.
Hetym razam śledčyja i palicejskija prybyli ŭ rezidencyju (Jun znachodziŭsia tam usie hetyja dni) kala 4:20 ranicy pa miascovym časie, i tolki ŭ pałovie adzinaccataj Biuro rasśledavańnia karupcyi abviaściła, što jany «ździejśnili aryšt Juna pa ordery».
La rezidencyi sabralisia jak prychilniki, tak i praciŭniki Juna. Kala tysiačy palicejskich z roznych bakoŭ pavolna prabivalisia na terytoryju rezidencyi praz barykady i zasłony z deputataŭ ad praŭładnaj prezidenckaj partyi. Uvajści ŭ dom prezidenta im udałosia tolki paśla dzieviaci ranicy.
Paśla hetaha tam jašče doŭha išli pieramovy — miarkujecca, pra formu źjaŭleńnia Juna na dopyt: jon chacieŭ, kab heta aficyjna ličyłasia dobraachvotnym. Ale BRK u chodzie hetych pieramovaŭ publična zajaviła, što prezident usio ž taki pavinien być aficyjna aryštavany.
Lidar apazicyjnaj Demakratyčnaj partyi ŭ parłamiencie Pak Čan De zajaviŭ, što aryšt Juna — heta śviedčańnie taho, što pravasudździe ŭ Paŭdniovaj Karei žyvie.
«[Aryšt Juna] — heta pieršy krok da adnaŭleńnia kanstytucyjnaha paradku, demakratyi i viaršenstva prava», — skazaŭ Pak.
Jak adznačaje karespandent Bi-bi-si ŭ Sieule Šajmaa Chalił, aryšt Juna nie pakładzie kaniec palityčnamu kryzisu — jon, chutčej, stanie jaho čarhovaj fazaj.
Pavodle zakona, ciapier śledčyja mohuć trymać Juna pad vartaj dvoje sutak, na praciahu jakich im treba albo atrymać zhodu suda na zaklučeńnie jaho pad vartu da suda, albo adpuścić prezidenta.
Niaklajeŭ apublikavaŭ złabadzionny vierš. U im zhadvajecca i Kaleśnikava z Babarykam, i Cichanoŭskaja, i Prakopjeŭ z Paźniakom23
Kamientary