Sud ES adchiliŭ pazovy «Biełaruśkalija» i BKK ab admienie sankcyj
Sud Jeŭrapiejskaha sajuza paćvierdziŭ zakonnaść sankcyj, uviedzienych suprać «Biełaruśkalija», hienieralnaha dyrektara pradpryjemstva Ivana Hałavataha i «Biełaruskaj kalijnaj kampanii». Rašeńnie było pryniata 18 červienia. Sud adchiliŭ apielacyi kampanij i top-mieniedžara, pakinuŭšy ŭ sile pastanovy suda ahulnaj jurysdykcyi ES ad vieraśnia 2024 hoda, piša Reform.news.
U sudovym rašeńni adznačajecca, što «Biełaruśkalij» źjaŭlajecca adnym z najbujniejšych vytvorcaŭ kalijnych uhnajeńniaŭ u śviecie i važnaj krynicaj dachodaŭ i valutnych pastupleńniaŭ dla biełaruskaj dziaržavy.
Sud pahadziŭsia z vysnovami Savieta ES pra toje, što pradpryjemstva padtrymlivaje režym Łukašenki, u tym liku za košt vypłaty dyvidendaŭ dziaržavie.
Sud taksama pakazaŭ, što supracoŭniki «Biełaruśkalija», jakija ŭdzielničali ŭ zabastoŭkach i mirnych akcyjach pratestu paśla vybaraŭ žniŭnia 2020 hoda, padviarhalisia cisku i zvalnieńniam.
U dakumiencie adznačajecca, što ŭdzielniki pratestaŭ pazbaŭlalisia premij, a Łukašenka publična pahražaŭ zamianić strajkujučych šachcioraŭ rabotnikami z Ukrainy.
Sud kvalifikavaŭ hetyja dziejańni jak padaŭleńnie hramadzianskaj supolnaści.
U dačynieńni da Ivana Hałavataha sud pakazaŭ, što jon zajmaŭ kirujučuju pasadu ŭ stratehična važnaj dla biełaruskaj ekanomiki kampanii, a taksama ŭvachodziŭ u skład Savieta Respubliki i zajmaŭ inšyja dziaržaŭnyja pasady.
Na dumku suda, heta śviedčyć pra jaho blizkaść da ŭład i padtrymku režymu.
«Biełaruskaja kalijnaja kampanija», jakaja vystupaje ekspartnym apierataram «Biełaruśkalija», pavodle acenki suda, karystałasia prefierencyjami z boku dziaržavy i spryjała atrymańniu dachodaŭ ad ekspartu kalijnych uhnajeńniaŭ.
Sud taksama adchiliŭ dovady zajaŭnikaŭ pra toje, što paniaćcie «režym Łukašenki» źjaŭlajecca jurydyčna niavyznačanym. U rašeńni padkreślivajecca, što hety termin dastatkova jasny i dazvalaje ŭstanaŭlivać suviaź pamiž dziejańniami kampanij i padtrymkaj biełaruskich uład.
Akramia taho, sud nie znajšoŭ parušeńniaŭ pryncypaŭ pravavoj vyznačanaści i suvymiernaści, pakazaŭšy, što abmiežavalnyja miery nakiravany na ŭzmacnieńnie cisku na biełaruskija ŭłady ŭ suviazi z parušeńniami pravoŭ čałavieka i padtrymkaj rasijskaj vajny suprać Ukrainy.
Apielantam zahadana pakryć sudovyja vydatki Rady ES.
Ciapier čytajuć
Pamiatajecie minčuka, jaki ŭ 2017‑m vyratavaŭ ściah z-pad noh amapaŭcaŭ — koštam svajoj svabody? Ciapier jamu, byłomu palitviaźniu, patrebnaja dapamoha1313
Pamiatajecie minčuka, jaki ŭ 2017‑m vyratavaŭ ściah z-pad noh amapaŭcaŭ — koštam svajoj svabody? Ciapier jamu, byłomu palitviaźniu, patrebnaja dapamoha13
«Biełaruś jany bačać častkaj Rasii». Što značyć uzdym «Alternatyvy dla Hiermanii», nakolki daloka heta moža zajści i jak siabie pazicyjanavać biełarusam5656
Kamientary
Imavierna advakaty Biełaruskalija buduć cisnuć na toje, što Biełaruskalij źjaŭlajecca adzinym vytvorcaj kalijnych uhnajeńniaŭ, a tamu sankcyi na kalijnuju halinu faktyčna źjaŭlajucca sankcyjami mienavita na Biełaruskalij. Ale pa-pieršaje biełaruskija ŭłady paśpieli nastvarać fejkavych vytvorcaŭ chłorkalija z sapraŭdnymi dakumantami. A pa druhoje - manapalizm biełaruskaj dziaržavy ŭ kalijnaj halinie źjaŭlajecca administracyjna stvoranym, to bok štučnym. Tamu naŭradci luby niezaležny arbitraž budzie razhladać padobny manapalizm jak abjektyŭna skłaŭšyjsia.